Լյարդի, լեղապարկի գործունեության խանգարումներն առողջական լուրջ խնդիր կարող են դառնալ: Դրանցից խուսափելու համար բնաբույժները բազում միջոցներ են առաջարկում, որոնցից մեկը ճարճատուկի՝ ցիկորիի պատրաստուկներն են:
1 գդալ մանրացված արմատներին ավելացնել 1 բաժակ եռման ջուր. եռացնել մարմանդ կրակի վրա 10 րոպե, սառեցնել, քամել: Ընդունել 0.5 բաժակ՝ օրը 2-3 անգամ:
Լյարդի ֆունկցիոնալ խանգարումների ժամանակ կարող եք 2 ճաշի գդալ մանրացված արմատներին ավելացնել 0,5 լիտր եռման ջուր, եռացնել մարմանդ կրակի վրա 15 րոպե, քամել: Եփուկին ավելացնել խնձորի քացախ: Ընդունել տաք վիճակում 0,5 բաժակից՝ օրը 2 անգամ, ուտելուց առաջ:
Լեղուղիների շարժողականության խանգարումների դեպքում 1 թեյի գդալ բույսին ավելացնել 1 բաժակ եռման ջուր, թրմել մինչեւ սառելը՝ թողնել սենյակային ջերմաստիճանում՝ կափարիչով ծածկված վիճակում, քամել: Ընդունել 0,5 բաժակ՝ օրը 2 անգամ՝ ուտելուց 30 րոպե առաջ:
Հիշեցնենք նաեւ, որ ճարճատուկն օժտված է լեղամուղ, միզամուղ, հակաբորբոքային, ախորժաբեր հատկություններով: Հաջողությամբ կիրառվում է նաեւ մարսողության խանգարումների՝ փքվածության, գլխացավերի, դանդաղ մարսողության, շաքարային դիաբետի, նյարդային գերգրգռվածության ժամանակ:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ»
27.10.2017
