«Դեռևս հնարավոր չէ հասնել նրան, որ Վիեննայի և Սանկտ Պետերբուրգի պայմանավորվածությունները կյանքի կոչվեն: Հայկական կողմը ցանկանում է համոզվել, որ բանակցությունների համար տրված ժամանակը Ադրբեջանը չի օգտագործի հերթական պատերազմը նախապատրաստելու վրա: Հայաստանը չի բանակցելու Ադրբեջանի հետ, քանի դեռ սահմանին վտանգներ կան եւ քանի դեռ Ալիևը մի ձեռքով բանակցում է, իսկ մյուսով՝ կրակում»,-քաղաքագետ Հրանտ Մելիք-Շահնազարյանը ՀՀ նախագահ Սերժ Սարգսյանի վերջին ելույթից այսպիսի եզրահանգումներ է անում:
«Արմենպրես» լրատվական գործակալությունում այսօր լրագրողների հետ հանդիպմանը նա համոզմունք հայտնեց, որ Արցախյան հակամարտության բանակցությունների հարցում հայկական կողմն արդեն իսկ կոշտացնում է իր դիրքորոշումը. «Հայաստանն այժմ խոսում է ոչ միայն Լաչինի միջանցքը պահելու, այլեւ այն տարածքների մասին, որոնք չեն սպառնում Արցախի անվտանգությանը»:
ԱԺ «Ելք» խմբակցության պատգամավոր Գեւորգ Գորգիսյանն էլ նշեց՝ որևէ բանակցային փաստաթղթի հավատալու հիմքեր չկան. «Վերջապես մեր ղեկավարությունը հանգեց այդ որոշմանը»:
Պատգամավորի խոսքով՝ Հայաստանը պետք գիտական ներուժն ուղղի նոր զինատեսակների արտադրությանը. «Ապրիլյան ռազմական գործողություններից հետո մեր իշխանությունները մի քիչ խելքի եկան, ինչ-որ բաներ արվում են»:
Լուիզա ՍՈՒՔԻԱՍՅԱՆ
