Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանում զինված խմբի գործով դատական նիստում այսօր հետազոտվեցին փաստաթղթերը:
Ընդմիջումից հետո գործընթացը շարունակվեց, սակայն ընթացքում ամբաստանյալների հանրային պաշտպանները եւ մասնավոր պաշտպաններից ոմանք դատավոր Արմեն Բեկթաշյանին միջնորդեցին նիստերն անցկացնել մինչեւ ժամը 15:00-ն, քանի որ իրենք ծանրաբեռնված են նաեւ այլ դատական գործերով: Հանրային պաշտպանի գրասենյակի փաստաբան Թամարա Բաղդասարյանը հայտնեց, որ իրենք օրը մոտ հինգ նիստ են ունենում եւ այդ պայմաններում ուրբաթ օրերը միայն մի նիստի տրամադրելը տեսականորեն հնարավոր չէ՝ չեն կարողանում հասցնել: Դատավոր Արմեն Բեկթաշյանը հակադարձեց, որ Հանրային պաշտպանի գրասենյակը տեղյակ է, որ ուրբաթ օրերն այս նիստն է նշանակված եւ փոխարինում է պաշտպաններին:
Մեկ այլ հանրային պաշտպան՝ Սյուզաննա Խչեյանը նշեց, որ իրենք ներգրավված են նաեւ այլ՝ «Սասնա Ծռերի», Ժիրայր Սեֆիլյանի գործերում եւ փոխարինման խնդիրները չեն աշխատում:
Դատավոր Արմեն Բեկթաշյանը այս անգամ կես օր աշխատելը հարգելի համարեց եւ նիստն ավարտեց: Սակայն նախազգուշացրեց, որ հաջորդ շաբաթվանից սկսած ուրբաթ օրերը լինելու են լիարժեք նիստեր:
Աշոտ ՀԱԿՈԲՅԱՆ
