Սոցցանցերում բուռն քննարկումների տեղիք են տվել ՀՀ զինված ուժերում ըստ կատեգորիաների հոգեւոր ծառայություն իրականացնող Հայ առաքելական եկեղեցու սպասավորների կենսաապահովման ամսական ծախսերի չափերը: Մասնավորապես, որոշ դժգոհություններ վերաբերում էին նրան, թե ինչու պետք է սահմանին կանգնած պայմանագրային զինծառայողի աշխատավարձը լինի 150000 դրամ, կամ ասենք՝ զինվորական բժիշկ սպայինը՝ 250 000 դրամ, իսկ հոգեւորականներինը` մինչեւ 300000 դրամ:
Թեմայի վերաբերյալ Aravot.am-ը մեկնաբանություն խնդրեց ՀՀ ԶՈՒ Հոգեւոր առաջնորդ Վրթանես եպիսկոպոս Աբրահամյանից: Սրբազանը տարակուսանք հայտնեց, ասելով, որ դա կառավարության որոշում է:
«Մեր հոգեւորականներն իրենց ծառայությունը բերում են ոչ թե 14 օր, ինչպես պայմանագրայինները, այլ ամբողջ ամիս` առավոտից իրիկուն: Իրենք գնում են հենակետեր, զինվորների հետ առանձնազրույցներ են ունենում, ինչպես հոգեբաններն ու իրավաբանները, հոգեւորականն էլ որպես հոգեւոր հովիվ իր ծխի հետ է անցկացնում ամբողջ օրը` անկախ այն արարողակարգերից, որ իրականացնում է` ժամերգություններ, մկրտություններ, դժբախտ դեպքերի արդյունքում հոգեհանգստյան արարողություններ եւ այլն: Նաեւ առանձնազրույցներ են լինում զինվորների հետ, որ տարակուսանքները, վախը, սթրեսները զինվորների միջից հանվի: Այդ գործառույթներն է իրականացնում հոգեւոր սպասավորը: Թվում է` ինքը շոշափելի բան չի կատարում, բայց հոգեւոր իմաստով ահռելի աշխատանք է անում: Ընդ որում, ոչ թե արդեն այսօր, այլ վաղուց` շուրջ 20 տարի: Եվ եթե ժամանակին հոգեւորականները դրա համար չէին վճարվում, այդ ծառայությունը ձրիաբար էին մատուցում, այսօր բողոքողներն ինչո՞ւ այն ժամանակ չէին խոսում: Հոգեւոր ծառայություն իրականացնող Հայ առաքելական եկեղեցու սպասավորների կենսաապահովման համար են այդ գումարները տրվում, որովհետեւ իրենք եւս ապրում են` հեռու քաղաքակրթությունից: Օրինակ, Եղնիկներում այսօր հոգեւորական է ապրում եւ ծառայում է: Դա էլ է ծառայություն: Հոգեւորականը լիարժեք ծառայություն է մատուցում: Եվ եթե հարցազրույց արվի զինվորականների շրջանում, անշուշտ նրանք կվկայեն, որ գնդերեցի աշխատանքը ծավալուն է եւ կարեւոր»,-ասաց ԶՈՒ Հոգեւոր առաջնորդը:
Գոհար ՀԱԿՈԲՅԱՆ
Վրթանես եպիսկոպոս Աբրահամյանի լուսանկարը` www.armchaplain.org կայքից:
