«Սեֆիլյանի եւ մյուսների» գործով դատական նիստում այսօր ամբաստանյալներից Ներսես Պողոսյանի շահերի պաշտպան, փաստաբան Արայիկ Պապիկյանը միջնորդեց որոշ անձանց որպես վկա հարցաքննել: Մասնավորապես, պաշտպանը միջնորդեց դատարան հրավիրել Արման Սահակյանին, Վարդան Բալյանին, Սեւակ Խաչատրյանին, Արմեն Լամբարյանին, որը «Սասնա ծռեր»-ի գործով ամբաստանյալներից է, Ժորժիկ Իսարյանին, Շահեն Պողոսյանին, Գոհարիկ Արշակյանին, Հրաչիկ Միրզոյանին, Ավետիք Հակոբյանին, որոնք հարցաքննվել են նախաքննության փուլում: Արայիկ Պապիկյանը գտնում է, որ նրանք կարող են ցուցմունքներ տալ ամբաստանյալների օգտին:
Մեղադրող-դատախազ Պետրոս Պետրոսյանը միջնորդության առնչությամբ ասաց, որ այն ժամանակին չէ արված եւ դրան կարելի է անդրադառնալ դատաքննության ավարտին, երբ հետազոտված լինեն գործով առկա ապացույցները: Դատավոր Տաթեւիկ Գրիգորյանը եւս գտավ, որ ապացույցները դեռ հետազոտված չեն, ուստի միջնորդությունը քննության առարկա չի դառնում: Այնուհետեւ դատարանն անցավ ապացույցների հետազոտման փուլին: Վերացվեց լրատվամիջոցների կողմից նիստը տեսանկարահանելու արգելքը:
Լուիզա ՍՈՒՔԻԱՍՅԱՆ
