Գերմանիայի «Քրիստոնյա-դեմոկրատական միություն» կուսակցության ֆրանկֆուրտյան շրջանային մասնաճյուղը 2012թ. 28 հազար եվրո է ստացել ադրբեջանական Socar նավթագազային պետական ընկերությունից՝ դրանով իսկ խախտելով կուսակցությունների հանգանակությունների մասին Գերմանիայի օրենքները: Այս մասին գրում է Deutsche Welle-ն:
Համաձայն Գերմանիայի ԶԼՄ-ների կոնսորցիումի բացահայտումների՝ 2012թ. փետրվարի վերջին Socar-ը Գերմանիայի իր ներկայացուցչության միջոցով Ֆրանկֆուրտում ՔԴՄ շրջանային կազմակերպությանն է փոխանցել 3000 և 25 հազար եվրոյի չափով գումար: Դա հանգեցրել է քառամյա իրավական վեճի՝ Բունդեսթագի համապատասխան վարչության հետ, քանի որ Գերմանիայի օրենսդրությունն արգելում է կուսակցություններին հանգանակություններ ստանալ Եվրամիության անդամ չհանդիսացող երկրներից:
Բունդեսթագում արդեն 2013թ. աշնանը որոշել են, որ համաձայն օրենքի՝ նման հանգանակությունն անթույլատրելի է, չնայած որ այն փոխանցվել է գերմանական հաշվեհամարից: ՔԴՄ-ն ամբողջ գումարը փոխանցել է դաշնային գանձարան:
Սակայն, չնայած օրենքի խախտմանը, կուսակցությունը տուգանք չի վճարի. Լայպցիգի վարչական դատարանն ընթացիկ տարվա ապրիլին որոշել է, որ մեղայականով ներկայանալը կարող է ոչ միայն մեղմացնել պատիժը, այլև ընդհանրապես հնարավոր է խուսափել պատժից:
Բունդեսթագի վարչությունը, սակայն, չի զբաղվել այն տեղեկության ճշտմամբ, թե ինչու է ադրբեջանական կոնսորցիումը տասնյակ հազարավոր եվրոյի հանգանակություն կատարել գերմանական կուսակցությանը: Socar-ի գերմանական մասնաճյուղի ղեկավար Էլմար Մամեդովի խոսքով՝ համագործակցությունը քաղաքական գործիչների և պաշտոնատար անձանց հետ կարևոր է «Ադրբեջանի և Socar-ի աշխարհաքաղաքական նշանակության ֆոնին»: Դրա մասին է վկայում, օրինակ, 7 երկրներով անցնող գազատարի նախագիծը, որը պետք է ավարտին հասցվի 2019թ.: Նախագիծն ընդունվել է 2013թ. ԵՄ այն ժամանակվա էներգետիկայի հարցերով հանձնակատար, գերմանացի քաղաքական գործիչ և ՔԴՄ անդամ Գյունթեր Էթինգերի աջակցությամբ:
Պատրաստեց Վիկտորյա ԱՆԴՐԵԱՍՅԱՆԸ
