Շենգավիթ վարչական շրջանի ընդհանուր իրավասության դատարանում այսօր շարունակվում է «Ժիրայր Սեֆիլյանի եւ մյուսների գործով» դատաքննությունը: «Հիմնադիր խորհրդարան» ընդդիմադիր շարժման առաջնորդ, Շուշիի առանձնակի գումարտակի հրամանատար Ժիրայր Սեֆիլյանը մեղադրվում է ապօրինի զենք-զինամթերք պահելու, հանցավոր նպատակներով խումբ (ամբաստանյալներ՝ Ներսես Պողոսյան, Սասունիկ Կիրակոսյան, Գալուստ Գրիգորյան, Հովհաննես Պետրոսյան, Գեւորգ Սաֆարյան, Հրայր Թոփչյան) ձեւավորելու, շենք-շինություններ, մասնավորապես՝ զորամաս եւ Երեւանի հեռուստաաշտարակը զավթելու փորձի մեջ:
Նիստերի դահլիճում են բոլոր ամբաստանյալները, բացի Գեւորգ Սաֆարյանից, որ նախորդ նիստերում դատարանի հանդեպ անհարգալից վերաբերմունքի, այն է՝ դատավորին գալուն պես ոտքի չկանգնելու եւ տեղից խոսելու համար որոշակի ժամանակահատվածով հեռացված է նիստերի դահլիճից:
Նախորդ նիստում որոշվել էր Սեֆիլյանի համար հանրային պաշտպան ներգրավել, եւ կրկին ներկայացել էր Հանրային պաշտպանի գրասենյակի փաստաբան Մարինե Թովմասյանը: Սակայն դատարանը, հաշվի առնելով այն փաստը, որ Սեֆիլյանի պաշտպան Տիգրան Հայրապետյանը եւս ներկայացել էր, որոշեց Մարինե Թովմասյանին չներգրավել:
Միաժամանակ, Տաթեւիկ Գրիգորյանը նախազգուշացրեց՝ եթե Տիգրան Հայրապետյանը շարունակի չարաշահել իր իրավունքները, ապա Սեֆիլյանը կզրկվի իր ցանկությամբ պաշտպան ունենալու իրավունքից: Տիգրան Հայրապետյանն առարկեց՝ ասելով, որ ամբաստանյալը ցանկացած պահի կարող է իր ցանկությամբ պաշտպան ունենալ:
Այնուհետեւ հրապարակվեց վկա Երեմ Պ.-ի նախաքննական ցուցմունքը, համաձայն որի՝ «Հիմնադիր խորհրդարանի» կողմից զանգվածային անկարգություններ կազմակերպելու կոչեր չեն հնչել: Վկան նշել է, որ ՀԽ-ից ճանաչել է Ժիրայր Սեֆիլյանին, որի համար համակարգչային ծառայություններ է մատուցել:
Երեմ Պ.-ի ցուցմունքի առնչությամբ Տիգրան Հայրապետյանը նկատեց՝ չկա հիշատակություն այն մասին, որ Ժիրայր Սեֆիլյանը զանգվածային անկարգություններ է նախապատրաստել: Փաստաբանը նաեւ հայտարարեց՝ նրանք, ովքեր մեղադրվում են զանգվածային անկարգություններ կազմակերպելու մեջ, քաղբանտարկյալներ են:
Լուիզա ՍՈՒՔԻԱՍՅԱՆ
