ԵԿՄ նախագահ Մանվել Գրիգորյանը դժվարանում է ասել՝ տասնութ տարի առաջ հոկտեմբերի 27-ին տեղի ունեցած ահաբեկչությունից չբացահայտված հարցեր կա՞ն:
«Չգիտեմ՝ չբացահայտված, գիտեմ՝ մարդիկ տույժեր, պատասխանատվություն են կրում, եթե կան էլ մարդիկ, որոնք չեն պատժվել, ոչինչ էդ էլ կմնա Տիրոջ հույսին, Տերը կպատժի: Մեր ժողովրդի նկատմամբ ով ոտնձգություն անի՝ լինեն երկրներ, անհատներ, անպայման կպատժվեն»,- ասաց գեներալ Մանվելը:
Հարցին, թե ինչ հետք թողեց 1999 թ. հոկտեմբերի 27-ը, պարոն Գրիգորյանը պատասխանեց. «Հայ ժողովրդի սգո օր թողեց, այդ օրը սպանվածները անհատական դեմքեր են եղել երկրի կառավարման համակարգում, դա ոտնձգություն էր հայ ժողովրդի նկատմամբ»:
Դիտարկմանը, թե ասում էին, որ Վազգեն Սարգսյանը շատերին էր խանգարում, ո՞ւմ էր խանգարում նա՝ գեներալը պատասխանեց, թե միայն թուրքերին էր խանգարում, ով որ նման բան է ասել, ուրեմն թուրք էր: Իսկ ներքաղաքական կյանքում, ըստ գեներալի, բոլորն են մեկը մեկին խանգարում, բայց ոչ թշնամանքով կամ մահացու. «Քաղաքական պայքար է, գաղափարների, մտքերի բանով ամեն մարդ իր գաղափարն է արտահայտում ու խանգարում են»:
Արփինե ՍԻՄՈՆՅԱՆ
