Պաշտոնապես հայտարարվեց, որ այս տարի Հայաստանում կատարված ներդրումները կազմել են 1 միլիարդ 24 միլիոն դոլար, որում ներառված են նաև վարկերը: Մի կողմ թողնենք, թե ինչքան է արդար, որ ներդրումներում ներառվեն նաև վարկերը, քանի որ շատ տնտեսագետներ պնդում են, որ դա հանրության աչքին «թոզ փչելու» և թվերն ուռճացնելու համար է: 1 միլիարդ 24 միլիոն դոլարը փոքր գումար չէ, որ հանրության կյանքում նկատելի չլինի: Աշխատավարձերը չեն բարձրացել, մարդկանց կենսամակարդակը նույնն է, աշխատանքը շատերը կորցրին, արտագաղթը շարունակում է թիվ մեկ սպառնալիք լինել, իսկ թանկացումների ալիքը մարդկանց հուսահատության է հասցնում արդեն: Ֆինանսների նախարար ՎԱՐԴԱՆ ԱՐԱՄՅԱՆԻՑ փորձեցինք ճշտել` ու՞ր են այդ գումարները, ինչի՞ վրա են ծախսվում, եթե իրավիճակը նույնն է:
-Ձեր հարցադրումը ոչ պրոֆեսիոնալ է,- ասաց նախարարը:
-Ես տնտեսագետ չեմ:
-Եկեք մեր կլոր սեղաններին մասնակցեք և կիմանաք, թե ուր են գնում այդ գումարները:
-Պարոն Արամյան, բոլորը չեն կարող ձեր կլոր սեղաններին մասնակցել, իմանալու համար, թե ինչի վրա են ծախսվում ներդրված գումարները։
-Եթե ցանկանում եք, Ձեր ասածը կմեկնաբանեմ: Դուք հիմա սպառում եք կատարում, չէ՞, դա առնչվում է նաև հոգևոր սպառմանը, երբ, օրինակ, հաճախում եք թատրոն: Երբ հարցնում եք` մարդը լա՞վ է ապրում, թե՞ վատ, պետք է նայեք սպառման ցուցանիշին, ասել է` սպառումը աճու՞մ է, թե՞ նվազում: Երկու հիմնական գործոն կա, որ այդ ցուցանիշի վրա ազդում է: Այդ մասին երկար հարցազրույց եմ տվել, ու ճանապարհներին ինձ բռնելու փոխարեն, այդ հարցազրույցները նայեք (նախարարը գալիս էր ԱԺ-կառավարություն հարցուպատասխանին մասնակցելու- Ռ. Խ.)։
Ճեպազրուցեց
Ռուզան ԽԱՉԱՏՐՅԱՆԸ
Հոդվածն ամբողջությամբ կարող եք կարդալ «Իրատես» թերթի այսօրվա համարում
