Կիտրոնաթուփն ու նրա պատրաստուկներն օժտված են ադապտոգեն (մտավոր եւ ֆիզիկական լարվածության ժամանակ բարձրացնում են օրգանիզմի դիմադրողականությունը միջավայրի սթրես գործոնների նկատմամբ¤, տոնուսավորող, ընդհանուր կազդուրիչ ազդեցությամբ: Պատրաստուկները նպաստում են արյան ճնշման բարձրացմանը, խթանում են սրտի գործունեությունը, լավացնում տեսողությունը, ունեն լեղամուղ ազդեցություն, ախորժաբեր են:
Որպես տոնուսավորող՝ մտավոր եւ ֆիզիկական գերհոգնածության ժամանակ կիտրոնաթփի սերմերին 1:5 հարաբերությամբ ավելացնել 70 տոկոսանոց սպիրտ, թրմել մութ տեղում 7 օր, քամել: Ընդունել 20-30 կաթիլից՝ սոված փորին: Բուժման կուրսը՝ 1 ամիս:
Կարող եք նաեւ 20 գրամ տերեւներին, ծաղիկներին, պտուղներին ավելացնել 200 միլիլիտր եռման ջուր, թրմել ջրաբաղնիքի վրա 15 րոպե, սառեցնել սենյակային ջերմաստիճանում 45 րոպե, քամել: Ընդունել 1/3 բաժակից՝ օրը 3 անգամ:
Հակացուցումներ եւ նախազգուշացումներ
Կիտրոնաթփի պատրաստուկները պետք է ընդունել միայն բժշկի նշանակումով, նրա հսկողության ներքո: Գերդոզավորումից կարող է առաջանալ նյարդային գերգրգռվածություն: Հակացուցված է անքնության, հիպերտոնիկ հիվանդության, սրտանոթային համակարգի օրգանական ախտահարումների, նյարդային գերգրգռվածության, ճարպակալման ժամանակ:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ»
26.10.2017
Հետաքրկրական հոդված է, սակայն ցանկալի պիտի լիներ, որ բուժիչ բույսի հայերեն անվան կողքին – որ վստահ եմ թվով շատ քիչ հայերի ծանոթ է – դրվեր նաև նրա լատիներեն անունը։ Դ.Ս.