«Ընտանեկան բռնության կանխարգելման օրենսդրությունը նախնական տեսքով պետք է ասեմ, որ խնդրահարույց է»,- այսօր ՀՀԿ ԳՄ նիստից հետո լրագրողների հետ զրույցում հայտարարեց ՀՀԿ խոսնակ Էդուարդ Շարմազանովը:
Նա նշեց, որ նախագծի հետ կապված մտահոգություններ ունեն նաեւ ՀՀԿ-ական իր շատ գործընկերները. «Մենք արդեն սկսել ենք քննարկումները, առաջիկա օրերին խմբակցությունը կներկայացնի իր առաջարկությունները: Մենք պահպանողական կուսակցություն ենք: Պահպանողականները լիբերալներ չեն, ազգային արժեքների, ավանդական ընտանիքի, եկեղեցու, մասնավոր սեփականության, էլ չեմ ասում Աստծո գաղափարի բացարձակ կրողներն են: Պահպանողականների համար ամբողջ աշխարհում ընտանիքը, լեզուն բացարձակ արժեքներ են: Մենք ազգային ավանդական ընտանիքի կողմնակից ենք եւ այն դրույթները, որոնք հակասության մեջ կմտնեն մեր Սահմանադրության եւ մեր ազգային ավանդական արժեքների հետ, դրանք խնդրահարույց են: Մենք պետք է քննարկենք եւ ներկայացնենք նոր մոտեցումներ: Նախնական տեսքից փոփոխություններ պետք է արվեն, իհարկե»:
Էդուարդ Շարմազանովն ասաց, որ ինքն էլ մտահոգիչ դրույթներ է տեսել եւ առաջարկություն է ներկայացրել. «Մենք պետք է հնարավորինս ամեն ինչ անեք, որ վտանգի տակ չդնենք մեր ընտանեկան ավանդական արժեքները: Մյուս կողմից պետք է դատապարտենք եւ քննադատենք բռնությունը: Բռնությանը որեւէ մեկը կողմ չի, բոլորս էլ դեմ ենք, մանավանդ՝ ազգային պահպանողականները: Հայ մարդու համար երբեք բռնությունը չի եղել գործելաոճ եւ պետք չի մեզ տարբեր բարբարոսական հոսանքների հետ համեմատել»:
Շարմազանովն ասաց, որ կնոջ դերը, մոր դերը մեր հասարակության մեջ միշտ բարձր է եղել. «Եթե 5-10 հոգի շեղված մարդիկ կան, որոնք բռնություն են կիրառում, ամբողջ հայկական ընտանիքների վրա չկիրառենք եւ ասենք, որ հայկական ընտանիքներում կա բռնություն: ՀՀ-ում ընտանիքը ամենաառողջ կորիզն է եւ մեր պետությունն էլ պետք է զարգացնենք այդ առողջ կորիզի վրա: Իհարկե, եթե կան խնդիրներ, պետք է բարձրաձայնենք, ոչ թե քողարկենք»:
Հռիփսիմե ՋԵԲԵՋՅԱՆ
