«Մեքսիկացի պատգամավորներին Ադրբեջանի սեւ ցուցակ ընկնելը չի էլ անհանգստացնում». Շարմազանով

ՀՀԿ ԳՄ նիստում այսօր քննարկվել են քաղաքական մեծամասնության աշխատանքները ԱԺ նիստերի ժամանակ, մի շարք օրենսդրական նախաձեռնությունների հետ կապված խնդիրներ, ՏԻՄ ընտրություններում ՀՀԿ-ի մասնակցության հարցերը: ՀՀԿ-ն այս պահին ունի 60 համայնքապետի թեկնածուներ, ԲՀԿ-ն՝ 6, ՀՅԴ-ն՝ 3:

Այդ մասին խոսելով՝ ՀՀԿ խոսնակ Էդուարդ Շարմազանովն ասաց, որ քաղաքական մրցակցությունը այնքան էլ մեծ ներկապնակ չունի: Նա նշեց, որ նիստում քննարկվել են նաեւ արտաքին քաղաքական եւ ներքաղաքական հարցեր:

Մեքսիկացի պատգամավորների՝ Արցախ այցի հետ կապված Ադրբեջանի արտգործնախարարությունն արդեն բողոքի նոտա է հղել, նրանց արդեն հասցրել են սեւ ցուցակներում ընդգրկել: Շարմազանովն այս կապակցությամբ ասաց. «Դա իմ մեքսիկացի գործընկերներին չի էլ անհանգստացնում, նրանք շատ լավ իմացել են, թե ուր են գալիս: Արցախում մենք ունեցել ենք շատ բարձր մակարդակի հանդիպումներ՝ ՀՀ նախագահի, ԱԺ նախագահի, բոլոր խմբակցությունների հետ կապված:

Երբ Ադրբեջանի դեսպանը կամ արտգործնախարարությունը ջանք չեն խնայում եւ ասում են, որ իրենք պետք է հետաքննություն սկսեն, թե ինչպես են իրենք հայտնվել ՀՀ-ում եւ Արցախում, ջանք խնայելու բան չկա, եղել է հրավեր իմ կողմից, իրենք ցանկացել են լինել Արցախում, իրենց աչքերով տեսնել Արցախի Հանրապետությունը, մենք իրենց ցանկությունը իրականացրել ենք: Մեկնել ենք, երկու օր եղել ենք Արցախում, շատ բարձր տրամադրությամբ վերադարձել են Արցախից, հասկացել են, որ Արցախում զարգանում է ժողովրդավարական անկախ պետություն եւ մի բան են հասկացել՝ ազատությունն ու անկախության սկզբունքը եւ արժեքը Արցախի քաղաքացիների համար անբեկանելի եւ անքննարկելի սկզբունք է»:

Շարմազանովը անդրադարձավ նաեւ Ժնեւյան հանդիպումից հետո Ադրբեջանի տարածքային ամբողջականության հետ կապված հայտարարություններին: Նրա խոսքով՝ դրանք ներքին սպառման համար են եւ որեւէ  ընդհանուր բան չունեն բանակցվող փաստաթղթի կամ սկզբունքների հետ. «Բայց եթե նույնիսկ ադրբեջանցիները խոսում են տարածքային ամբողջականության մասին, այստեղ եւս պետք է իրենց հիասթափեցնեմ՝ Արցախը որեւէ առնչություն չունի Ադրբեջանի տարածքային ամբողջականության հետ: Արցախը ոչ մի օր, ոչ մի վայրկյան չի եղել անկախ Ադրբեջանի կազմում»:

Շարմազանովն ասաց, որ 23-24 թթ-ին ԼՂԻՄ-ն ունեցել է իր Սահմանադրությունը, Խորհրդային ժամանակաշրջանում, ԼՂ-ն ընդամենը տնտեսական կապի մեջ է եղել Ադրբեջանի հետ, նա ունեցել է  Խորհրդային միության ԳԽ-ում 4 պատգամավոր՝ առանց Ադրբեջանի միջնորդության:

Ըստ Շարմազանովի, ինչքան իրավունք ունեին Հայաստանը, Լատվիան, Վրաստանը անկախանալու Խորհրդային միությունից, այնքան իրավունք էլ ուներ Ղարաբաղն անկախանալու եւ նույն ընթացակարգերով ԼՂ-ն անջատվել է ոչ թե Ադրբեջանից այլ՝ Խորհրդային Միությունից:

Հռիփսիմե ՋԵԲԵՋՅԱՆ