Շախմատի Հայաստանի տղամարդկանց եւ կանանց ազգային հավաքականներն այս գիշեր մեկնել են Կրետե կղզի: Հերսոնեսոս քաղաքում հոկտեմբերի 28-ին մեկնարկում են տղամարդկանց 21-րդ եւ կանանց 12-րդ թիմային առաջնությունները:
Մեկնելուց առաջ գլխավոր մարզիչներ Արշակ Պետրոսյանը եւ Արթուր Չիբուխչյանը խոսել են նախապատրաստության ընթացքի եւ նպատակների մասին:
Արշակ Պետրոսյան. «Հոկտեմբերի 14-ից 24-ը թիմը հավաք է անցկացրել Ծաղկաձորում, որտեղ տղաներն աշխատել են ինչպես զուտ շախմատային պարապմունքների, այնպես էլ ֆիզիկական պատրաստվածության վրա: Յուրաքանչյուրը օրվա առաջին կեսին զբաղվել է ֆիզիկական կուլտուրայով եւ իր նախընտրած մարզաձեւով: Նրանց մարզական նախասիրությունները որքան էլ տարբեր են, բայց բոլորն էլ հաճույքով միասին ֆուտբոլ են խաղում: Թիմում տրամադրվածությունը բարձր է: Տղաները ցանկանում են հաջող հանդես գալ Եվրոպայի առաջնությունում: Հավաքականի կորիզը կազմում են բազմափորձ գրոսմայստերներ Լեւոն Արոնյանը, Գաբրիել Սարգսյանը, Սերգեյ Մովսեսյանը, Հրանտ Մելքումյանը: Նրանց առաջին անգամ միացել է Հայաստանի չեմպիոն Հովհաննես Գաբուզյանը, որը լավ շախմատիստ է, կարողանում է խաղատախտակի առջեւ իրեն լավագույն կողմերով դրսեւորել: Նա կարող է օգտակար լինել հավաքականին: Սակայն առաջնության ընթացքը ցույց կտա, թե դրա անհրաժեշտությունը որքան կլինի:
Ընդհանրապես, Հերսոնեսոսում շատ հետաքրքիր ճակատամարտեր են սպասվում: Մի քանի թիմեր են հավակնելու չեմպիոնի տիտղոսին: Հուսով եմ՝ մենք նույնպես կլինենք նրանց շարքում», – ասել է Արշակ Պետրոսյանը:
Կանանց ազգային հավաքականը նույնպես նախապատրաստությունն անցել է Ծաղկաձորում: Գլխավոր մարզիչ Արթուր Չիբուխչյանը գոհ է Էլինա Դանիելյանի, Լիլիթ Մկրտչյանի, Լիլիթ Գալոյանի, Մարիա Կուրսովայի եւ Մարիա Գեւորգյանի մարզավիճակից, սակայն գերադասել է կանխագուշակություններ անելուց ձեռնպահ մնալ:
Աշոտ ՀԱԿՈԲՅԱՆ
