«Սասնա Ծռեր-3» գործով դատարանը քիչ առաջ հեռացավ խորհրդակցական սենյակ՝ որոշում կայացնելու Կարո Եղնուկյանի միջնորդության վերաբերյալ:
Կարո Եղնուկյանն այսօր երկու միջնորդություն ներկայացրեց, առաջին՝ տեսակցությունների արգելքն ամբողջովին վերացնելու վերաբերյալ, ինչը դատարանը մասնակի բավարարեց՝ թույլատրելով տեսակցել նրա հետ միայն հարազատներին՝ արգելելով այլ անձանց հետ տեսակցությունները:
Երկրորդ միջնորդությունը վերաբերում էր խափանման միջոց կալանքը գրավի դիմաց փոփոխելուն, ինչի վերաբերյալ որոշում ընդունելու համար դատարանը քիչ առաջ հեռացավ խորհրդակցական սենյակ:
Հիշեցնենք, որ դատավոր Արտուշ Գաբրիելյանը «Սասնա ծռեր»-ի 18 անդամի գործից մաս էր անջատել. ամբաստանյալներ Արամ Մանուկյանի, Թաթուլ Թամրազյանի, Տիգրան Մանուկյանի, Սերգեյ Կյուրեղյանի, Թորոս Թորոսյանի, Գևորգ Իրիցյանի, Հովհաննես Հարությունյանի, Արայիկ Հակոբյանի, Մարտիրոս Հակոբյանի, Արամ Հակոբյանի Վարդան Գերավետյանի վերաբերյալ գործն այլևս Արտուշ Գաբրիելյանի վարույթում չի քննվի, իսկ ամբաստանյալներ Արթուր Մելքոնյանի, Տիգրան Սարգսյանի, Արթուր Սողոմոնյանի, Գառնիկ Հովակիմյանի, Հովհաննես Վարդանյանի, Մանվել Աթայանի, Վարդգես Գևորգյանի գործը մնացել էր հենց Արտուշ Գաբրիելյանի վարույթում, որն էլ ստացվում է «Սասնա ծռեր 3»:
Արփինե ՍԻՄՈՆՅԱՆ
