«Իր անհեռանկար քայլերով կամ հայտարարություններով Ադրբեջանն իր անկախությունն է հարցականի տակ դնում: Եթե իր համար այդքան սուրբ է տարածքային ամբողջականությունն, ապա ո՞ւր է անկախացել»,-այսօր կառավարությունում լրագրողների հետ զրույցում ասաց փոխարտգործնախարար Շավարշ Քոչարյանը:
Հարցին, թե Հայաստանի նախագահն ասում է` կամ պիտի բանակցենք, կամ` կրակենք, կրակելու տարբերա՞կն է առաջ գնում, պարոն Քոչարյանը պատասխանեց. «Խնդիրը հետեւյալն է, բանակցություններին խանգարողն Ադրբեջանն է, այնպես չէ, որ հայկական կողմերը խուսափել են բանակցություններից, ճիշտ հակառակը: Երկու հայկական կողմն էլ միշտ հակված են բանակցությունների, բայց, եթե քո հակառակորդը քեզ պարտադրում է, ասում է` կամ ամեն ինչ, ինչպես ես եմ ուզում, կամ` պատերազմ, ապա, բնական է, տեղիք տալ չի կարելի»:
Պարոն Քոչարյանի մեկնաբանություններն առավել մանրամասն` տեսանյութում
Շավարշ Քոչարյանը նաեւ ասաց, որ հայկական կողմը սեղանի շուրջ փակ բանակցությունները երբեք չի խախտել եւ չի էլ խախտի. «Խախտողը, մենք գիտենք՝ միշտ ով է, որովհետեւ այն, ինչ որ խոսվում է բանակցություններում, դրանից դուրս ուրիշ բան է ասվում: Դա այնքան ակնհայտ է, որ բավական է տեսնել համանախագահող երկրների նախագահների 5 հայտարարություն, որտեղ ասվում է՝ ինչ է ասվել բանակցություններում եւ երեք սկզբունքները միջազգային իրավունքի, որով պետք է առաջնորդվեն բանակցող կողմերը եւ` ինչ որ խոսում է Ադրբեջանը, այդքանը բավական է հասկանալու համար»:
Շավարշ Քոչարյանը համոզված է, որ այդպիսի անհեռանկար քայլերով Ադրբեջանն իրեն մղել է փակուղի. «Դա վերաբերում է, ոչ միայն բանակցային գործընթացին` իր ներքին քաղաքականության, արտաքին քաղաքականության: Արդյունքում նաեւ փակվում է իր ճանապարհն այդ փակուղուց դուրս գալու»:
Լուսինե ԲՈՒԴԱՂՅԱՆ
