ԱԺ-ում լրագրողների հետ զրույցում «Ելք» խմբակցության պատգամավոր Էդմոն Մարուքյանն արձագանքեց նաեւ Պաշտպանության նախարար Վիգեն Սարգսյանի՝ այսօր ԱԺ ամբիոնից իր հասցեին ուղղված հետեւյալ նկատառմանը. «Ո՞նց է եղել, որ զինծառայության հետ բարձրագույն կրթություն է ստացել նույն տարիների ընթացքում, այդ ժամանակ հեռահար կրթություն չկար: Եթե նա ստացել է արտոնություն, ուզում եմ հարցնել՝ էդ ի՞նչ թաքուն պայմանավորվածությունների միջոցով է ստացել»: Հիշեցնենք, որ քննարկվում է «Զինվորական ծառայության եւ զինծառայողի կարգավիճակի մասին» օրենքի նախագիծը, որը ենթադրում է տարկետման վերացում, «Ելք»-ն էլ դեմ է նախագծին:
Էդմոն Մարուքյանը պարզաբանեց, որ ծառայել է 1999-2001թթ. «Սովորել եմ առաջին կուրսը, հետո ծառայել, հետո՝ շարունակել ուսումը»: Ապա նշեց՝ ՀՀԿ-ականները շահարկում են փաստը, որ այդպիսի լավ օրինակներ կան, ուստի կարելի է ծառայել, հետո՝ կրթության եւ գիտությամբ զբաղվել: «Հարցը հետեւյալն է՝ շատերը, որոնք բանակում չեն ծառայել, ՊՆ մեդալներ ունեն: Նման մարդկանց տարիներ շարունակ մեդալներ տալով՝ ՀՀԿ-ն խրախուսել է բանակում չծառայելը»,-համոզմունք հայտնեց Էդմոն Մարուքյանը:
Հետո նա հետեւյալը հիշեց. «Երբ ես սովորում էի Պետական կառավարման ակադեմիայում, մագիստրոսական թեզի պաշտպանության ժամանակ Վիգեն Սարգսյանը պետական հանձնաժողովի նախագահն էր: Քչերը «5» ստացան պաշտպանությունից, այդ թվում՝ ես, եւ Վիգեն Սարգսյանն ամենաշատ հարցերն ուղղեց ինձ, գուցե հիմա չի՞ հիշում: Եթե իմ կրթական ճանապարհի հետ կապված կասկածներ լինեին, Վիգեն Սարգսյանի ղեկավարած հանձնաժողովը ինձ «5» չէր նշանակի»:
Էդմոն Մարուքյանն անդրադարձավ նաեւ ԱԺ փոխնախագահ Էդուարդ Շարմազանովի բացատրություններին, թե ինչու ինչը չի ծառայել: «Կարծում եմ՝ ինքը, մեղավորության զգացում ունենալով, եկավ իր անունը տվեց եւ սկսեց արդարանալ: Իրեն բան ասող չի եղել…չգիտեմ՝ ինչո՞ւ չի գնացել բանակ, բայց իր հետ կապված հարց չի էլ եղել»,-նկատեց Մարուքյանը:
Մանրամասն ՝ տեսանյութում:
Լուիզա ՍՈՒՔԻԱՍՅԱՆ
