Սխտորն ու նրանից ստացվող պատրաստուկներն օժտված են հակասնկային, հակամանրէային, հակաճիճվային հատկություններով, խթանում են ստամոքս-աղիքային տրակտի շարժողականությունը, ունեն լեղամուղ ազդեցություն, հիպոլիպիդեմիկ՝ իջեցնում են արյան մեջ խոլեստերինի պարունակությունը, իջեցնում են նաեւ արյան ճնշումը: Այն ախորժաբեր է, խթանում է սեռական գեղձերի գործունեությունը, բարձրացնում օրգանիզմի դիմադրողականությունը վարակիչ հիվանդությունների նկատմամբ: Կիրառվում է աղիներում փքվածության եւ նեխման պրոցեսների ընկճման, քրոնիկական բրոնխիտների, թոքաբորբերի ժամանակ: Արդյունավետ է նաեւ տիֆի, դիզենտերային ամեոբայի, խոլերայի հարուցիչների, ստրեպտա-ստաֆիլակոկային վարակների նկատմամբ:
Դեղատոմսեր եւ պատրաստուկներ
Մրսածություն, հարբուխ, վարակիչ հիվանդություններ
2-3 պճեղ սխտորին ավելացնել 1 բաժակ եռման ջուր, թրմել 1 ժամ, քամել: Ընդունել տաք վիճակում, քնելուց առաջ:
Աթերոսկլերոզ
250 գրամ մանրացված սխտրին ավելացնել 350 գրամ մաքուր մեղր, թողնել 1 շաբաթ մութ տեղում: Ընդունել 1 ճաշի գդալից օրը 3 անգամ՝ ուտելուց հետո:
Լսողության տարիքային վատթարացում
10 գրամ մանրացված սխտորին ավելացնել 30 միլիգրամ ձիթապտղի չզտված յուղ, թողնել մութ տեղում 2 օր, քամել թանզիֆի օգնությամբ: Գոլ վիճակում 1-2 կաթիլ կաթեցնել յուրաքանչյուր ականջին: Բուժման կուրսը՝ 15-20 օր:
Միգրեն
2 միջին մեծության գլուխ սխտորը մանրացնել, ավելացնել ձիթապտղի չզտված յուղ այնքան, մինչեւ սխտորային զանգվածը ծածկվի, ծածկել կափարիչով եւ 10 օր թրմել արեւի տակ՝ օրը 2 անգամ զանգվածը խառնել, այնուհետեւ քամել թանզիֆի օգնությամբ՝ զանգվածը ճզմելով, ավելացնել 3-4 կաթիլ գլիցերին: Ստացված սխտորի յուղի 1 ճաշի գդալին ավելացնել 0,5 լիտր 40 տոկոսանոց սպիրտ: Թուրմը քսել քունք-ճակատային մասերին՝ միգրենային ցավերի ժամանակ:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ»
25.10.2017
