«Այսօր գրեթե հնարավոր չէ խոսել արդիականացման եւ մրցունակության բարձրացման մասին՝ առանց թվային օրակարգի: Հասկանալի է, որ այս ծավալուն խնդրի լուծմանը անհրաժեշտ է շարժվել` հաշվի առնելով տնտեսությունների` այդ փոփոխություններն ընդունելու ունակությունը, առանց բիզնեսի համար ավելորդ ծախսերի»,-այս մասին այսօր Երեւանում տեղի ունեցած Եվրասիական միջկառավարական խորհրդի նիստում իր ելույթի ժամանակ ասաց ՀՀ վարչապետ Կարեն Կարապետյանը:
Նրա խոսքերով՝ «Կրկնեմ Սոչիում կայացած Եվրասիական տնտեսական բարձրագույն խորհրդի նիստում Հայաստանի նախագահի հնչեցրած դիրքորոշումը. թվային լուծումների մշակումը կարելի է իրականացնել, ունենալով էլեկտրոնային հաշիվ-ֆակտուրաների փոխադարձ ճանաչման մեխանիզմը»:
Ըստ ՀՀ վարչապետի, ԵԱՏՄ անդամ պետությունների համաձայնեցված տրանսպորտային քաղաքականության հիմնական ուղղությունների եւ փուլերի իրականացման «ճանապարհային քարտեզն» ընթանում է տրանսպորտի եւ ենթակառուցվածքների մասով ԵԱՏՄ-ի մասին պայմանագրի համապատասխան դրույթների զարգացման հունով. «Մեզ համար, հաշվի առնելով ԵԱՏՄ երկրների հետ ընդհանուր սահմանների բացակայությունը, լոգիստիկ եւ տրանսպորտային, կոմունիկացիոն ուղղվածություն ունեցող հարցերն առավել քան արդիական են: Մենք ակնկալում ենք, որ «ճանապարհային քարտեզի» իրագործումը կնպաստի մեր պետությունների միջեւ տրանսպորտային հաղորդակցության դիվերսիֆիկացմանը: ԵԱՏՄ-ում էներգետիկ ընդհանուր շուկայի ձեւավորման շրջանակներում մենք շահագրգռված են դուրս գալու տեղեկատվական փոխանակման այնպիսի համակարգի, որը կհամապատասխանի էլեկտրաէներգիայի փոխադարձ առեւտրի աճի խնդրին, կնպաստի էներգետիկ համակարգերի զուգահեռ աշխատանքի ռեժիմների պլանավորմանը»:
Մյուս տարի, ինչպես ասաց Կարապետյանը, «Եվրասիական շաբաթը» նախատեսվում է անցկացնել Հայաստանում: Այսպիսի նախագծերի իրագործումն, ըստ ՀՀ վարչապետի, նպաստում է բիզնեսի եւ պետությունների միջեւ ուղիղ երկխոսության զարգացմանը:
Նելլի ԲԱԲԱՅԱՆ
