Այսօր «Մուլտի Գրանդ հոթել» հյուրանոցային համալիրում մեկնարկել են Եվրասիական միջկառավարական խորհրդի՝ նեղ եւ ընդլայնված կազմով նիստերը: Օրակարգում ընդգրկված գլխավոր հարցերից մեկի՝ տրանսպորտային ոլորտի փաստաթղթերի թվայնացման վերաբերյալ ԵՏՀ նախարար Կարինե Մինասյանը լրագրողների հետ զրույցում ասաց, որ թվայնացման օրակարգի համար նախանշվել են մի քանի ուղղություններ՝ թվայնացման վերահսկողություն, թվային տրանսպորտային միջանցքներ, թվային առեւտուր, տվյալների ստացման մշակում:
Ըստ Մինասյանի, տրանսպորտային ոլորտի փաստաթղթերի թվայնացումը նպաստելու է ապօրինի ապրանքաշրջանառության նվազեցմանը, հավասար մրցակցությանն ու ծախսերի կրճատմանը:
Նախարարի փոխանցմամբ՝ նիստում անդրադարձ է կատարվել ԵԱՏՄ անդամ երկրների օրենսդրությունների եւ համաձայնագրերի համապատասխանեցմանը, հաստատվել է ճանապարհային քարտեզ՝ ներքին շուկայում արգելքները վերացնելու վերաբերյալ, ֆիքսվել է ոսկյա զարդերի հարգադրոշմման փոխճանաչման հարցը: Ոսկյա զարդերի հարգադրոշմման փոխճանաչման հարցը դեռ պետք է հաստատվի ԵԱՏՄ երկրների կողմից:
Մինասյանի խոսքերով՝ քննարկվել են նաեւ ապրանքների տրանզիտ փոխադրման տեխնիկական կարգավորման հարցերը:
Մինասյանի վստահեցմամբ՝ « Հայաստանի համար ամենամեծ ձեռքբերումն է՝ ԵԱՏՄ շուկաներում հայկական ապրանքների ազատ շարժի հնարավորություն կլինի»:
Նելլի ԲԱԲԱՅԱՆ
