«Ադրբեջանը միայն մեկ ձեւ է պատկերացնում հարցի լուծումը`ինքը ոչ մի զիջում չանելով, հարցը պետք է կարգավորվի: Բնականաբար, ամեն անգամ, հանդիպումների ժամանակ բախվում է պատին եւ նորից վերադառնում է իր ելակետին: Այսինքն`հարցը լուծի ուժային միջոցներով, պատերազմով, շանտաժի լեզվով»,- խորհրդարանում լրագրողների հետ զրույցում ասաց ՀՅԴ խմբակցության ղեկավար Արմեն Ռուստամյանը`պատասխանելով դիտարկմանը, որ հոկտեմբերի 16-ին Ժնեւում կայացած Սարգսյան-Ալիեւ հանդիպումից հետո ՀՀ նախագահը հայտարարեց, որ սահմաններում լարվածությունը թուլացնելու մասին համաձայնության են եկել ադրբեջանցի գործընկերոջ հետ: Սակայն, այդ պայմանավորվածությունից տառացիորեն օրեր անց, Ադրբեջանն անցավ իր նախկին գործելաոճին: Երեկ կրկին սահմաններում լարված է եղել, հակառակորդն ականանետեր է կիրառել:
«Շատ հստակ է`կամ բանակցում ենք, կամ`պատերազմում ենք: Ադրբեջանը փորձում է այդ երկուսը համատեղել, որը անհնար է: Բնական է, որ մեր կողմից էլ արձագանքը շատ հստակ պետք է լինի`մենք երկու դաշտում էլ պետք է աշխատենք, երկուսին էլ պետք է պատրաստ լինենք»,- ասաց Արմեն Ռուստամյանը:
Aravot.am-ի հարցին`հանդիպումից հետո նախագահ Սարգսյանը շատ լավատեսորեն էր տրամադրված, իր ժպիտն ու լավատեսությունը շատ քննարկվեց-քննադատվեց. ո՞րն էր լավատեսության հիմքը, առաջին անգա՞մն էր Ադրբեջանի նախագահի հետ հանդիպում-պայմանավորվածությունը, ՀՅԴ-ական պատգամավորը պատասխանեց. «Ես անձամբ հանդիպմանը չեմ եղել, բայց կարծում եմ, որ լավատեսության հիմքն այն է եղել, որ հանդիպման ժամանակ Ալիեւի պահվածքը այլ է եղել»,- ասաց նա` նկատելով, որ Ադրբեջանի նախագահը միշտ այլ պահվածք է դրսեւորում, հանդիպումներից հետո վերադառնում է իր «ելման կետին»: Դիտարկմանը`Սերժ Սարգսյանը դա չգիտե՞ր, պատասխանեց. «Սերժ Սարգսյանը եթե գիտեր`ժպտալն արգելվա՞ծ է»:
Արմեն Ռուստամյանը կարծում է, որ այս իրավիճակում ԵԱՀԿ Մինսկի խմբի համանախագահները պետք է հստակեցնեն իրենց դիրքորոշումը, մանավանդ, մեկ անդամ դա արդեն արել են:
Այլ մանրամասները` տեսանյութում
Նելլի ԳՐԻԳՈՐՅԱՆ
