Եվրախորհրդարանի՝ քաղաքացիական ազատությունների, արդարադատության և ներքին գործերի կոմիտեն պաշտպանել է նախաձեռնությունը, որի համաձայն Վրաստանի քաղաքացիները պետք է ստանան «նախնական թույլտվություն»՝ նախքան առանց վիզայի Եվրոպա մտնելը:
Եվրախորհրդարանի որոշման և Վրաստանի քաղաքացիների վրա դրա հնարավոր հետևանքների մասին լրագրողներին պատմել է Վրաստանի փոխարտգործնախարար Վախթանգ Մախարոբլիշվիլին, գրում է «Գրուզիա Օնլայնը»:
Նախնական թույլտվություն ստանալու համար քաղաքացին պարտավոր է լրացնել հատուկ հայց էլեկտրոնային ձևաչափով, դրան կցել տեղեկանքներ աշխատավայրից և եկամուտների մասին (նախքան վիզաների չեղարկումը այդ տվյալներն ուղարկվում էին դեսպանատների հյուպատոսական բաժին), վճարել 10 եվրո և սպասել Շենգեն գոտի մուտքի իրավունքի:
Փոխնախարարը նշել է, որ նոր համակարգը միայն կհեշտացնի Շենգեն գոտի մտնելու կարգը՝ նվազեցնելով սահմանից վերադառնալու հավանականությունը: Ընդ որում, նա խնդրել է «նախնական թույլտվությունը» չնույնականացնել վիզային ռեժիմի վերադարձի հետ:
Մախարոբլիշվիլին նշել է, որ նոր կարգավորումը դեռ գտնվում է քննարկման փուլում, և ոչ մեկը չգիտի՝ որքան կտևեն խորհրդակցությունները: Այս փուլում Եվրամիությունը նպատակ ունի այն հաստատել 2020թ-ից:
Պատրաստեց՝ Վիկտորյա ԱՆԴՐԵԱՍՅԱՆԸ
