«Լարվածությունը բնական է, որովհետեւ, ըստ երեւույթին, բանակցություններն Ադրբեջանի ուզածով չեն գնում, Ժնեւի հանդիպման ժամանակ էլ հայացքներից զգացվում էր, դրանից էլ թթված՝ սադրիչ գործողությունների են դիմելու: Փառք Աստծո, մերոնք այսօր իրավիճակին լավ են տիրապետում»,- այսօր «Ելակետ» ակումբում ասաց ռեժիսոր Արշակ Զաքարյանը:
Նրա խոսքով, ամենայն հավանականությամբ, սահմանի լարվածությունը գնալով կուժեղանա. «Բայց անկանխատեսելի է, թե Ադրբեջանն այս պահին ոնց կգնա, ով կարող է ասել: Աստված տա, չարխայինանանք, հենց արխայինանանք, պատերազմը լինելու է»:
Նա վստահեցրեց, որ հայկական կողմը աներկբա պատժիչ գործողություններ է իրականացնում ի պատասխան ադրբեջանական ռազմական գործողությունների ու դրանց տասից մեկի մասին են հրապարակայնացնում. «Մենք այնպիսի հակառակորդի հետ գործ ունենք, որ եթե հանդուրժենք, տասը անգամ ավելին կանեն»:
Արշակ Զաքարյանն ասաց, որ վաղը մեկնում է սահման՝ այն հատված, որտեղ այս օրերին լարվածությունը մեծ է, նա նաեւ հավելեց, որ չի բացառվում, որ ադրբեջանցիներն այս լարվածությունն առաջացնելով՝ հայերին էին փորձում. «Փորձեցին, տեսնեն՝ կարողանո՞ւմ են մեզ դրանով հունից հանել, որ ասեն՝ տեսեք հայերը խախտեցին: Բայց բախտները չի բերել, որովհետեւ ամբողջ սահմանը նկարվում է, իրենց ցանկացած գործողություն երեւում է, նկարում ենք, փաստը դնում ի ցույց, հիմա իրենց լեզուները կարճացել են»:
Արփինե ՍԻՄՈՆՅԱՆ
