Սկեսուրը, սկեսրայրը, զոքանչն ու աները Ընտանեկան բռնության կանխարգելման մասին օրենքի փոփոխված նախագծով համարվում են ընտանիքի անդամներ: Այսօր այս մասին «Հայացք» ակումբում ասաց փաստաբան Տիգրան Սարգսյանը:
Փաստաբանը զարմանում է, որ իր գործընկեր փաստաբաններն ընդդիմանում են նախագծին. «Եթե մենք ցանկանում ենք մեր երկրում բռնության դեմ պայքարել, լավագույն տարբերակը դրա կանխարգելումն է: Իհարկե, պատիժները նույնպես կանխարգելիչ նշանակություն ունեն, բայց աշխարհի փորձը ցույց է տալիս, որ կանխարգելումն ավելի արդյունավետ է: Մարդը միանգամից հանցագործ չի դառնում եւ հանցագործ դառնալու համար ինքը վատ ճանապարհ է անցնում, հոգեկան աշխարհը քայքայվում է եւ մենք մարդուն պիտի օգնենք, որ ինքն իրեն փոսը չգցի»:
Փաստաբանն իր գործընկերների պահվածքը բացատրում է հասարակությանը հաճոյանալու ցանկությամբ. «Շատ իրավաբաններ չեն ուզում հասարակության կողմից քննադատվել, քանի որ իշխանությունն էլ հասարակության կողմից ընդունելի չէ, նրանք ուզում են հասարակության անունից խոսել, նրան հաճո լինել, որպեսզի հետագայում իրենց չմեղադրեն իշխանության պատվերը կատարելու մեջ»:
Մանրամասները` տեսանյութում
Հարցին, թե օրենքին ընդդիմացողները պնդում են, որ Քրեական եւ այլ օրենքներով նախատեսված են պատիժներ բռնությունների համար, եւ որ նոր օրենքի անհրաժեշտություն չկա, պարոն Սարգսյանն ասաց, որ Քրեական օրենսգրքում որեւէ տարբերակում չկա բռնությունը խանութում կլինի, փողոցում, թե` աշխատավայրում. «Ընտանիքի հետ կապված առանձնացվում է, որովհետեւ ընտանիքը փակ է եւ այնտեղ մտնելու համար առանձնահատուկ կարգ պետք է սահմանվի»:
Օրենքի նախագծով հստակեցվել է՝ ով է համարվում ընտանիքի անդամ: Ըստ փաստաբանի՝ սկեսուրը, սկեսրայրն ու զոքանչն էլ են համարվելու ընտանիքի անդամ. «Ընտանիքի անդամ համարվում են ամուսնության մեջ գտնվող, որոնք օրենքով գրանցված են եւ նաեւ օրենքով չգրանցված` փաստացի ամուսնության մեջ գտնվող զույգերը, նրանց երեխաները, սկեսուր, սկեսրայր, եղբայր, քույր, զոքանչ, աներ: Նշեմ, որ իրավապահ մարմնի ներկայացուցիչը կարող է ներխուժել ընտանիք, իր լիազորությունները իրականացնել, եթե կա բողոք, այսինքն` այնպես չէ, որ պետության ներկայացուցիչը երբ ուզի` քաղաքացու դուռը կթակի»:
Լուսինե ԲՈՒԴԱՂՅԱՆ
