Լցոնի մեջ առատ թարխունի առկայությունը այս տոլմային յուրահատուկ համ եւ բույր է տալիս: Իսկ դդմիկի եւ սխտոր- մածունի համադրությունը վաղուց հայտնի «զիլ» ընկերություն է:
Անհրաժեշտ մթերքները
Դդմիկ-10-12 հատ
Աղացած միս- 800-1000 գրամ
Սոխ- 1 մեծ կամ 2 փոքրիկ գլուխ
Սխտոր-2-3 պճեղ
Տոմատի մածուկ- 3 ճաշի գդալ
Թարխուն- 1 կապ
Աղ, սեւ եւ կարմիր աղացած պղպեղներ` ըստ ճաշակի
Դարչին- կես թեյի գդալ
Բրինձ- կես բաժակ
Կարագ-100 գրամ
Պատրաստման եղանակը
Սկզբում պատրաստեք լցոնը: Եթե միսը ինքներդ եք աղալու, ապա նկատի ունեցեք, որ միայն տավարի միսը բավականաչափ յուղոտ չէ, եւ լցոնի մեջ հավելյալ կարագ է պետք ավելացնել` մոտ 50-60 գրամ: Լցոնի յուղայնությունն ավելացնելու համար կարող եք տավարի մսի հետ մի քիչ խոզի յուղոտ միս աղալ կամ, եթե սիրում եք գառան համը` մի քիչ գառան դմակ: Եթե խանութից եք առնում աղացած միսը, հավելյալ կարագի կարագ չկա, քանի որ մսավաճառները միսն աղալիս ավելացնում են բավականաչափ ճարպ:
Սոխն ու սխտորը մաքրեք, լվացեք: Լվացեք նաեւ թարխունը: Շատ մանր կտրատեք եւ ավելացրեք աղացած մսին: Ավելացրեք նաեւ տոմատի մածուկը, համեմունքները, լվացած բրինձը: Լավ խառնեք:
Լցոնը կարող եք մեկ օր առաջ պատրաստել եւ պահել սառնարանում:
Դդմիկները լավ լվացեք: Մեջտեղից կիսեք եւ թեյի գդալով զգուշորեն հանեք միջուկը: Միջուկը կարող եք չնետել, այլ շատ քիչ ջրով շոգեխաշել` ավելացնելով 1-2 պճեղ սխտոր եւ կես գլուխ սոխ, աղ, սեւ ու կարմիր պղպեղ: Վերջում էլ վրան մեկ ճաշի գդալ կարագ դրեք եւ պատառաքաղով տրորեք: Շատ համեղ խավարտ կլինի` ցանկացած մսեղենի հետ:
Դդմիկները լցոնեք: Եթե դդմիկները չբավականացնեն, կարող եք նաեւ թարմ կանաչ պղպեղ եւ խաղողի թուփ լցոնել: Թարխունի համը դրանց հետ եւս շատ տեղին կլինի: Կաթսայի հատակին կամ դդմիկի բարակ շերտեր դրեք, կամ խաղողի տերեւներ: Դդմիկները շարեք կաթսայի մեջ: Վրան դրեք կարագի կտորը, կես բաժակ ջուր: Ծածկեք որեւէ ափսեով, ապա` կափարիչով: Դրեք մարմանդ կրակին` մոտ մեկ ժամ:
Մատուցեք մածունով, որի մեջ ձեր ճաշակով սխտոր եք ճզմել: Կարող եք մածունին էլ մանրած թարխուն ավելացնել:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
