«ՆԱՏՕ-ն մշտադիտարկում է բոլոր մարտահրավերները տարբեր ուղղություններով»,-ասում է Վիտոլդ Վաշչիկովսկին
Հայաստան այցելած Լեհաստանի ԱԳ նախարար Վիտոլդ Վաշչիկովսկին այսօր ՀՀ ԱԳՆ-ում լրագրողների հետ հանդիպմանը գոհունակությամբ մատնանշեց սեպտեմբերին կայացած ՀՀ եւ Լեհաստանի նախագահների հանդիպումը՝ հույս հայտնելով, որ երկու երկրների միջեւ գործակցությունը կշարունակվի ամենաբարձր մակարդակով:
«Այդ գործակցությունը վերաբերում է նաեւ տնտեսական մակարդակին: Ինչպես ՀՀ ԱԳ նախարարը նշեց՝ ներուժն ընդարձակելու հնարավորություններ կան: Լեհական մի շարք արտադրողներ պատրաստակամություն են հայտնել գործակցելու հայաստանյան ընկերությունների հետ»,-տեղեկացրեց Վիտոլդ Վաշչիկովսկին:
Այնուհետեւ նա ընդգծեց՝ շուտով Բրյուսելում կկայանա ԵՄ Արեւելյան գործընկերության գագաթաժողովը, եւ ինքը Հայաստանում է որպես ԵՄ-ի եւ ՆԱՏՕ անդամ երկրի արտգործնախարար. «ՆԱՏՕ-ն մշտադիտարկում է բոլոր մարտահրավերները տարբեր ուղղություններով, եւ ես այստեղ եմ՝ լսելու ՀՀ քաղաքական գործիչների մտահոգությունները՝ նաեւ անվտանգության խնդիրների մասով»:
Լուիզա ՍՈՒՔԻԱՍՅԱՆ
