Մարդկային զարգացման միջազգային կենտրոնի ղեկավար Թևան Պողոսյանը համոզված է, որ եթե ամեն ինչ ճիշտ կազմակերպենք, 2018-ը բավարար կլինի ՀՀ-ԵՄ շրջանակային համաձայնագրի վավերացման գործընթացն ավարտելու համար:
Նշենք, որ համաձայնագրի ստորագրումը նախատեսվում է նոյեմբերի 24-ին, սակայն գործընթացը ձգձգվում է:
«Պոստ սկրիպտում» մամուլի ակումբում անդրադառնալով հիմնավորումներին, թե փաստաթուղթը որոշ լեզուներով թարգմանված չէ, որն էլ ձգձգման պատճառն է, պարոն Պողոսյանն արձագանքեց. «ՀՀ-ԵՄ համաձայնագրի ստորագրման հարցում չկա որևէ քաղաքական խոչընդոտ, թարգմանության հետ կապված խնդիր ևս չկա: Միակ բանը, որ կարող է լինել, ֆորսմաժորային իրավիճակն է, որը նոյեմբերի 24-ին տեղի չի ունենում: Դա նշանակում է, որ մենք հիմա քիչ-քիչ պետք է սկսենք քննարկել, բարձրաձայնել ու պահանջատեր լինել այդ նույն պայմանագրի կատարման որակի հանդեպ, մտածենք, թե ոնց ենք բանակցելու, օգտագործել այն բոլոր հնարավորությունները, որոնք թույլ կտան Հայաստանին ապրել արդիական զարգացում և թռիչք»:
Ըստ պարոն Պողոսյանի` համաձայնագրի վավերացումը քաղաքական, տեխնիկական բնույթ ունի, և Եվրամիությունը պետք է ջատագովը լինի ու անդամ պետություններին խնդրի արագացնել վավերացման գործընթացը:
Տաթև ՀԱՐՈՒԹՅՈՒՆՅԱՆ
