«Ժիրայր Սեֆիլյանի եւ մյուսների գործով» դատական նիստում այսօր, ինչպես ավելի վաղ հայտնել էինք, ամբաստանյալներից հացադուլի մեջ գտնվող Ներսես Պողոսյանի համար շտապօգնություն էր կանչվել:
Նիստը վերսկսվելուն պես դատավոր Տաթեւիկ Գրիգորյանը հայտարարեց, որ ըստ բժշկի գրության՝ Ներսես Պողոսյանն ինքնուրույն մոտեցել է բուժզննման, նրան առաջարկվել է ենթարկվել զննության, սակայն վերջինս հրաժարվել է եւ հայտնել, որ դրա կարիքը չկա:
«Սուտ է ասում: Հեքիաթ է պատմում»,-լսելով դա՝ տեղից բղավեց Ներսես Պողոսյանը: Նրա շահերի պաշտպաններից փաստաբան Նինա Կարապետյանցը պարզաբանեց, որ նա ի վիճակի չէ անգամ կանգնել, ոստիկաններն են նրան բերել. «Նա պառկած էր, զոռով են բերել ոստիկանները, նա ի վիճակի չէ»: Կարապետյանցը կրկին միջնորդեց նիստը հետաձգել, քանի որ Ներսես Պողոսյանը չի կարող ներկա գտնվել:
Ժիրայր Սեֆիլյանի շահերի պաշտպան, փաստաբան Տիգրան Հայրապետյանն էլ հայտարարեց՝ եթե նիստը չհետաձգվի, պաշտպանները չեն ներկայանա, որովհետեւ դատարանի համար, փաստորեն, մարդկային կյանքն արժեք չունի: ամբաստանյալ Ժիրայր Սեֆիլյանն էլ կանգնեց ու ասաց, որ հեռանում է, քանի որ չի ուզում ներկա լինել Ներսեսի «խոշտանգման արարողությանը»:
Ներսես Պողոսյանը եւս ցանկացավ հեռանալ: Դատավոր Տաթեւիկ Գրիգորյանը նրա եւ Սեֆիլյանի հանդեպ նախազգուշացում կիրառեց, ապա նիստը ընդմիջեց:
Լուիզա ՍՈՒՔԻԱՍՅԱՆ
