Լրագրող Քսենյա Սոբչակը հայտարարել է, որ պատրաստվում է մասնակցել Ռուսաստանի նախագահական ընտրություններին: Ընդ որում, այդ մասին զրույցներ պտտվում էին դեռ ամիսներ առաջ, սակայն Սոբչակը հերքում էր դա:
Սոբչակը հայտարարել է, որ իր այդ մտադրության մասին տեղյակ է պահել Վլադիմիր Պուտինին: Նրա կարծիքով՝ Պուտինին այդ գաղափարն այնքան էլ դուր չի եկել:
«Պուտինն ասաց, որ յուրաքանչյուր ոք իրավունք ունի որոշում կայացնել և պետք է պատասխանատվություն կրի դրանց համար, որից հետո հարցրեց մայրիկիս առողջության մասին,- ասել է Սոբչակը:- Ինձ թվաց, որ իմ որոշումը նրան դուր չեկավ»:
Արդեն Սոբչակի հայտարարությունից հետո Ռուսաստանի նախագահի մամուլի քարտուղար Դմիտրի Պեսկովին հարցրել են՝ արդյոք Սոբչակի որոշումը համաձայնեցվել է Պուտինի հետ: Պեսկովը բացասական պատասխան է տվել:
Ռուսաստանի ընդդիմադիր շրջանակներում Սոբչակի այս որոշումը մտավախությունների տեղիք է տվել առ այն, որ նա «Պուտինի խաղն է խաղում» և իր առաջադրմամբ ձայներ կփախցնի նրա գլխավոր մրցակցից՝ Ալեքսանդր Նավալնիից:
Ռուս բլոգեր Իլյա Վարլամովը հավաքել է Ռուսաստանի հասարակական և քաղաքական գործիչների մեկնաբանությունների Սոբչակի առաջադրման վերաբերյալ:
Դմիտրի Պեսկով.
«Քսենյան շատ տաղանդավոր մարդ է, նա փորձ է հավաքել տարբեր ոլորտներում, նա բավականին կրթված է: Բայց եթե նա ինչ-որ հայացքներ ունի քաղաքականության նկատմամբ, նա պետք է զրոյից փորձ հավաքի, քանի որ քաղաքականությունը տարբերվում է լրագրությունից, շոու-բիզնեսից, այն միանգամայն այլ սուբստանցիա է:
Քաղաքականությունն առաջին հերթին ենթադրում է մարդկանց կամարտահայտում. դա գլխավոր դրույթն է: Եթե ինչ-որ առումով Քսյուշան ի վիճակի է պատասխանել այդ կամարտահայտմանը, ապա, անկասկած, նա շանսեր ունի քաղաքականության մեջ»:
Բոժենա Ռինսկա
«Գարշելի արարած. որոշել է առաջադրվել, անասու՛ն»:
Յուրի Դուձ.
«Քսե՛նյա, երկար ժամանակ, Դուք ինձ համար օրինակ եք ծառայել: Բնականաբար, ոչ բոլոր հարցերում, բայց աշխատանքում որ հաստատ: Դուք մեծացել եք որպես մարդ, որն ամեն ինչ ունի, և որը կարող է այլևս երբեք չաշխատել: Բայց դրանով հանդերձ Դուք աշխատում եք՝ մասնավոր, ազնիվ (հավանաբար) և անբասիր: Այդ նկրտումները և այդ աշխատանքը ես միշտ հարգել եմ: Բայց այսօր Դուք գործեցիք այս տարվա ամենատարօրինակ, թերևս ամենավտանգավոր սխալը: Ես շատ եմ տխրում, Ձեզ չեմ հասկանում, բայց միևնույն ժամանակ ուզում եմ հասկանալ Ձեր դրդապատճառները»:
Վլադիմիր Ժիրինովսկի
«Նախագահի թեկնածու պետք է դառնա այն մարդը, որը երկար տարիներ քաղաքականության մեջ է: Մարդը երկրով չի շրջել, ոչինչ չգիտի, ոչինչ չի ղեկավարել: Չունի համապատասխան գիտելիքներ: Դա պարզապես վտանգավոր է: Նախ, ոչ մեկ նրան չի ընտրի: Նա կեղծ թեկնածու է, դրածո»:
Անդրեյ Ֆուրսենկո (Ռուսաստանի նախագահի օգնական)
«Ես սկզբում կարծեցի՝ դա կատակ է, հետո ինձ ասացին, որ ճիշտ է: Դե լավ, մենք ապրում ենք ազատ երկրում, մեզ մոտ յուրաքանչյուրն իրավունք ունի, որոշակի կանոններ կան, ստորագրություններ է պետք հավաքել… Կարծում եմ, որ նա հաստատ սփոյլեր չէ»:
Սերգեյ Ուդալցով
«Բայց եթե 2012թ. Պրոխորովի առաջադրումը շատերին շեղեց, Սոբչակն արդեն շատ բացահայտ է: Կրեմլի ականջները կիլմոմետրից երևում են J »:
Դմիտրի Գուդկով
«Թող 100 ծաղիկ ծաղկի: Թող բոլորն էլ առաջադրվեն՝ Նավալնին, Սոբչակը, Յավլինսկին: Իրավունք ունի՞ Քսենյան առաջադրվել: Ունի՛: Եթե նրա լսարանն էլ իմանա, որ «Պուտինը գող է», ավելի լավ: Ամբողջ հարցն այն է՝ արդյոք Քսենյան կցանկանա դա ասել կամ արդյոք կկազմի «սահմանադրական ընդդիմություն»: Վստահ եմ՝ նա դա հասկանում է»:
Միխայիլ Խոդորկովսկի
«Դիտեցի Քսենյայի ելույթը: Իսկ դուք գիտե՞ք՝ դրանում ինչ-որ բան կա: Նա իսկապես կարող է մարդկանց օգնել՝ հասկանալու «ընտրություններ առանց ընտրությունների» հասկացության էությունը»:
Պատրաստեց՝ Վիկտորյա ԱՆԴՐԵԱՍՅԱՆԸ
