Ավան եւ Նոր Նորք վարչական շրջանների ընդհանուր իրավասության դատարանում այսօր նշանակված էր 2016թ. ոստիկանության ՊՊԾ գունդը գրաված եւ մի շարք ծանր հանցագործությունների մեջ մեղադրվող «Սասնա ծռեր» զինված խմբի անդամներից 10-ի՝ Արթուր Մելքոնյանի, Տիգրան Սարգսյանի, Արթուր Սողոմոնյանի, Գառնիկ Հովակիմյանի, Հովհաննես Վարդանյանի, Վարդգես Գեւորգյանի, Մանվել Աթոյանի, Արմեն Լամբարյանի, Աշոտ Պետրոսյանի, Խաչատուր Գիշչյանի եւ Կարո Եղնուկյանի գործով դատական նիստը, որը նախագահում է դատավոր Արտուշ Գաբրիելյանը: Հիշեցնենք, որ «Սասնա ծռեր»-ի գործը կիսվել է երեք մասի եւ Գաբրիելյանի վարույթում նշյալ ամբաստանյալների մասով քրեական գործի քննությունն է մնացել:
Նիստի մեկնարկին Արտուշ Գաբրիելյանը կողմերին տեղեկացրեց, որ ամբաստանյալներից Խաչատուր Գիչյանի ինքնազգացողությունը վատացել է, նրա համար շտապօգնություն են կանչել: Բժիշկն արձանագրել է, որ նախկինում սրտի վիրահատության ենթարկված Գիչյանը սրտի եւ թոքի շրջանում ցավեր ունի, իսկ ճնշումը 230/120 է, ուստի հետագա բարդությունից խուսափելու նպատակով նրան տեղափոխել են հիվանդանոց: Հիշեցնենք, որ Գիչյանը մեղադրվում է զինված խմբին օժանդակելու մեջ. բեռնատարը, որով «Սասնա ծռեր» խմբի անդամները ներխուժել էին ՊՊԾ գնդի տարածք, նրան է պատկանում:
Արտուշ Գաբրիելյանն արձանագրեց, որ ամբաստանյալի բացակայությամբ չեն կարող նիստը շարունակել, ուստի այն կկայանա հաջորդ հինգշաբթի՝ 11 00-ին: Հավելենք, որ այս գործով դառական նիստերը նշանակված են յուրաքանչյուր հինգշաբթի, իսկ մյուս երկու գործերով նիստերի օրեր դեռ չեն նշանակվել:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
