The Armenian Interest կենտրոնի ղեկավար Արեգ Գալստյանի համոզմամբ, ԵԱՀԿ Մինսկի խումբը ղարաբաղյան հակամարտության կարգավորման ո՛չ մեխանիզմներ, ո՛չ էլ՝ հնարավորություններ ունի:
«Մինսկի խումբը կազմակերպություն է, որը ստեղծվել է միջազգային հարաբերություններում երկբեւեռ համակարգի ժամանակահատվածում, երբ գոյություն ունեին միջազգային որոշակի կանոններ, եւ երբ պետությունները նման կազմակերպություններին լուրջ մեխանիզմներով էին օժտում, որոնք թույլ էին տալիս կարգավորել այս կամ այն հակամարտությունը»,- այսօր «Նովոստի Արմենիա» ակումբում ասաց Գալստյանը:
Նա ԵԱՀԿ Մինսկի խումբը երկբեւեռ համակարգի մնացուկ է համարում, իսկ ժամանակակից հանրությունը միաբեւեռ համակարգում է ապրում. «Նման կազմակերպությունները չունեն լուրջ մեխանիզմներ, որոնք կարող են այս կամ այն կողմին ստիպել որեւէ առաջարկ ընդունել»:
Պարոն Գալստյանի կարծիքով, ԵԱՀԿ Մինսկի խումբն ավելի շատ ամբիոնի դեր է կատարում կողմերի բանակցությունների անցկացման համար, ինչը հնարավորություն է տալիս միայն ստատուս քվոն պահպանել եւ համակարգային լուրջ բեկում ակնկալել պետք չէ:
«Քանի դեռ կողմերը առավելագույն նշաձողի վրա են կանգնած, ոչ մեկը ոչինչ անել չի կարող: Այսինքն, ո՛չ ԵԱՀԿ Մինսկի խումբը, ո՛չ ԱՄՆ-ն, ո՛չ Ռուսաստանը, ո՛չ Ֆրանսիան չեն կարող ուղղակի վերցնել եւ Երեւանին կամ Բաքվին ստիպել ընդունել առաջարկների որեւէ կոնկրետ փաթեթ, եթե կողմերն իրենք դա չցանկանան»,- հավելեց բանախոսը:
Արփինե ՍԻՄՈՆՅԱՆ
