«Օրենքը նպաստելու է ոչ թե ընտանիքների միավորմանը, այլ՝ քայքայմանը, ապաստարաններ տեղավորելուց հետո օրենքը չի ասում, թե հետագայում նրանց հարաբերությունները ինչպես են կառուցվելու, ինչ է լինելու 6 ամիս հետո»,- այսօր Փաստաբանների պալատում Ընտանեկան բռնության կանխարգելման մասին օրենքի նախագծի շուրջ քննարկման ժամանակ այսպիսի տեսակետ հայտնեց ՓՊ անդամ իրավաբան Արտաշես Խալաթյանը:
Ոստիկանության ներկայացուցիչ Արթուր Վարդանյանն ասաց, որ օրենքի ընդունումը եթե չվերացնի ընտանեկան բռնությունները, գոնե ինչ-որ չափով կնվազեցնի, կկանխի դեպքերը:
«Հանուն ինքնիշխանության վերականգնման» կազմակերպության նախագահ Հայկ Նահապետյանն ասաց, որ չկա երկիր, որտեղ այս օրենքի ընդունումից հետո կա դրական տեղաշարժ. «120 երկրում ընդունել են օրենքը, պետք է վիճակագրություն տան՝ այդ երկրներում ինչպիսին է իրավիճակը, ընտանեկան բռնությունների թիվը, ամուսնալուծությունները, երեխաներին ընտանիքներից դեպի ապաստարաններ օտարելու դեպքերը»:
Հայկ Նահապետյանը ստամբուլյան կոնվենցիայից մեջբերում արեց, թե ինչ ասել է բռնության կանխարգելում. «Ընտանեկան բռնությունը ձեւակերպվում է, որ դա ընտանիքում ֆիզիկական, հոգեբանական, սեռական, տնտեսական բռնություններն են, որոնք կատարվում են ընտանեկան միավորների ներսում, ներկա, նախկին ամուսինների կամ զուգընկերների միջեւ: Որեւիցե մեկի համար գաղտնիք չի զուգընկերները ովքեր են՝ միասեռական զույգերն են: Ի՞նչ կապ ունի միասեռական զույգերի ամրագրումը ընտանեկան բռնությունների կանխարգելման հետ»:
«Լույս» տեղեկատվական վերլուծական կենտրոնի ղեկավար Հայկ Այվազյանն էլ Ընտանեկան բռնության կանխարգելման օրենքն ընդունած երկրներից որոշ տվյալներ ներկայացրեց. «Գերմանիայում 2011-ին օտարված երեխաների քանակը կազմել է 38 հազար երեխա, 2016-ին հասել է քանակը 84 հազարի, Նորվեգիայում, որը եւս հայտնի է իր անխնա եւ դաժան գործող երեխաների իրավունքների պաշտպանության ծառայություններով՝ 10 հազարից ավելի երեխա»:
Նա ասաց՝ համեմատենք թվերը եւ կտեսնենք, որ իրականում այն երկրներում, որտեղ նմանատիպ օրենքներ են գործում, բռնությունների աճ է գրանցվում, ամուսնալուծությունների աճ եւ որեւէ կանխարգելման մասին խոսք չի գնում:
«Համահայկական ծնողական կոմիտեի» հիմնադիր անդամ Լիա Ավետիսյանն ասաց, որ 21 տարի է, ինչ Գերմանիան այս օրենքն ընդունել է ու 21 տարվա մեջ 620 հազար երեխա են օտարել. «Մի ամբողջ սերնդի երեխաներ են տարել, գողացել: Նրանք այլեւս երեխա չեն ունենալու, մնում են տղամարդ ու անպտուղ, տղամարդկանց մտցրել են մի անկյուն ու չեն թողնում շնչել, իրենք վախենում են երեխա ունենալ: Նրանք նախընտրում են շուն պահել, ասում են՝ շանը չեն խլի մեզանից: Սա համաշխարհային աղետ է եւ հիմա էլ այս աղետը բերում են մեր գլխին, չպիտի՛ թողնենք»:
Լրագրող Արթուր Հովհաննիսյանն ասաց, որ կառավարությանը կաշառք է տրվելու բյուջետային աջակցման տեսքով, պաշտոնյաների հաշիվները արտերկրում են գտնվում եւ չեն կարող չկատարել արտերկրից եկող պահանջները: Սա պետք է փաթաթել եւ ընդհանրապես աղբամանը նետել:
Հռիփսիմե ՋԵԲԵՋՅԱՆ
