Պատմաբան, ռազմական փորձագետ Արթուր Եղիազարյանը համոզված է, որ օրերս ԱԺ-ում Պաշտպանության նախարարի ներկայացրած՝ «Զինապարտության և զինվորական ծառայության մասին օրենսդրական նոր կարգավորումների վերաբերյալ» օրենքի նախագիծը կարգավորում է մի շարք հարցեր, որոնք նախկինում լիարժեք լուծում չունեին: «Այս փոփոխությունները պարտադրանքի ոճով չեն. կան կետեր, որոնք քաղաքացուն հնարավորություն են տալիս զինծառայության մեջ կամավորության սկզբունքով ընտրություն կատարել»,-«Պոստ Սկրիպտում» մամուլի ակումբում այսօր լրագրողների հետ հանդիպմանն ասաց Եղիազարյանը:
Թեեւ Վիգեն Սարգսյանը նշել էր, որ օրենսդրական նոր կարգավորումները պայմանավորված չեն ՀՀ ժողովրդագրական խնդիրներով, Արթուր Եղիազարյանի խոսքով՝ մեր երկիրն ունի ժողովրդագրական խնդիր, իսկ երկրի պաշտպանությունն էլ իր պահանջներն է առաջադրում. «Ենթադրենք, սահմանը պահելու համար 30 000 զինվոր է պետք: Դա իրողություն է՝ անկախ նրանից՝ բնակչության թիվը պակասո՞ւմ է, թե ոչ: ՊՆ-ն առաջնորդվել է ոչ թե պարտադրանքով, այլ մեխանիզմներ է առաջարկել՝ «Ես եմ» եւ «Պատիվ ունեմ» ծրագրերը»:
Եղիազարյանն անդրադարձավ նաեւ վերջերս ԱԺ վավերացրած համաձայնագրին, որը վերաբերում է ՀՀ-ի եւ ՌԴ-ի միջեւ պայմանագրի շրջանակներում մատակարարվող ռազմական նշանակության արտադրանքի եւ նպատակային օգտագործման նկատմամբ ՌԴ-ի կողմից հսկողության իրականացմանը: «Ռուսաստանի հետ ունենք ռազմական դաշինք, այդ ամենը դրա շրջանակում է: Մեր իշխանություններն ընդունել են այդ պայմանները, ռուսական կողմին մեղադրելու հարց չկա: Այլ տարբերակ Հայաստանն ունե՞ր: Մենք պայթյունավտանգ տարածաշրջանում ենք, նման պայմաններում մեզ միջոցներ են պետք եւ դաշնակցություն»,-նկատեց փորձագետը:
Լուիզա ՍՈՒՔԻԱՍՅԱՆ
