Հարցում էինք ուղարկել ՀՀ նախագահի աշխատակազմի ներման, քաղաքացիության, պարգեւների եւ կոչումների բաժնի պետ Ջեմմա Հակոբյանին՝ խնդրելով հայտնել, թե Սերժ Սարգսյանի պաշտոնավարման ընթացքում (2008 թվականից մինչ օրս) քանի՞ դատապարտյալ է ներման խնդրագրով դիմել նախագահին։ Քրեական օրենսգրքի ո՞ր հոդվածներով դատապարտված անձինք են ներման խնդրագիր ներկայացրել, քանի՞սն է բավարարվել, քանի՞սը՝ մերժվել։ Մեզ ուղարկված պատասխանից տեղեկանում ենք, որ ամեն տարի մի քանի հարյուր դատապարտյալ է ներում հայցել, սակայն նրանց սակավ մասն է ստացել։ Ըստ այդմ՝ 2008 թ. ապրիլից մինչ օրս ներման խնդրագրով դիմել է 246 դատապարտյալ, ներում է շնորհվել 22-ին, 2009-ին՝ 373 դատապարտյալ, ներում է շնորհվել 38-ին։ 2010-ին դիմել է 494-ը, ստացել՝ 45-ը։ 2011-ին՝ 450-ը, ներում է շնորհվել 40 դատապարտյալի։
Սերժ Սարգսյանին ամենաշատը ներման խնդրագրով դիմել են 2012-ին՝ 555 դատապարտյալ, սակայն ներում է ստացել ընդամենը 32-ը։ 2013-ին դիմել է 424-ը, ներում ստացել 23-ը, 2014-ին՝ 238-ը, ստացել 22 դատապարտյալ։ 2015-ին դիմել է 266-ը, ստացել 2-ը, 2016-ին՝ 361-ը, ներում է շնորհվել 30 դատապարտյալի։ 2017-ի հունվարից առայսօր դիմել է 188-ը, ներում է շնորհվել 22 դատապարտյալի։ Այսպիսով, իր պաշտոնավարման ընթացքում Ս. Սարգսյանն ամենաշատը 2010-ին է ներում շնորհել՝ 45 դատապարտյալի։
Ընդհանուր առմամբ, նախագահն իր պաշտոնավարման 9.5 տարվա ընթացքում ներում է շնորհել 300 դատապարտյալի։
Հեղինե ՄԱՆՈՒԿՅԱՆ
Հոդվածն ամբողջությամբ կարող եք կարդալ «Հրապարակ» թերթի այսօրվա համարում
