Աջափնյակ եւ Դավթաշեն վարչական շրջանների ընդհանուր իրավասության դատարանն այսօր մեղավոր ճանաչեց ապօրինի ծառահատումներ կատարած «Դելֆին» լողի մանկապատանեկան մարզադպրոցի տնօրեն Ալեքսան Սամսոնյանին:
Դատարանը նրան դատապարտեց վեց ամսվա ազատազրկման՝ միաժամանակ վճռելով պատիժը պայմանական չկիրառել՝ սահմանելով փորձաշրջան:
Սամսոնյանի փաստաբան Արմեն Մելքոնյանից Aravot.am-ը հետաքրքրվեց՝ նախաքննության ընթացքում պնդում էր, որ իր պաշտպանյալը բնապահպան լինելով՝ չէր կարող ծառեր հատել, այդ ծառերը միայն էտել է, այդ ինչպես ստացվեց, որ այնուամենայնիվ ձեր պաշտպանյալն ընդունեց մեղքը, ի պատասխան փաստաբանն ասաց՝ այդ հարցն ուղղեք իրեն. «Ես՝ որպես փաստաբան, զերծ կմնամ մեկնաբանություններից»:
Հիշեցնենք, որ Ալեքսան Սամսոնյանին մեղադրանք է առաջադրվել, որ նա, չունենալով ծառահատման թույլտվություն, բենզասղոցով ապօրինի հատել է անտառային ֆոնդի մեջ չմտնող 21 հատ բարդի տեսակի կենսունակ ծառեր, որի հետևանքով Երևան համայնքին պատճառել է առանձնապես խոշոր չափի` 1.920.000 ՀՀ դրամի գույքային վնաս:
Արփինե ՍԻՄՈՆՅԱՆ
