Ինչպես ավելի վաղ հայտնել էինք, Էրեբունի եւ Նուբարաշեն վարչական շրջանների ընդհանուր իրավասության դատարանում այսօր 2016թ. հուլիսի 29-ին զանգվածային անկարգություններ կազմակերպելու եւ ոստիկանության ՊՊԾ գունդը գրաված ու մի շարք ծանր հանցագործությունների մեջ մեղադրվող «Սասնա ծռեր» զինված խմբին օժանդակելու մեջ մեղադրվող քաղաքական գործիչ Անդրիաս Ղուկասյանի կալանքը գրավով փոխելու միջնորդությունը մերժվեց:
Այնուհետեւ Ղուկասյանի շահերի պաշտպան, փաստաբան Կարեն Մեժլումյանը ներկայացրեց դատավոր Վարդան Գրիգորյանի ինքնաբացարկի միջնորդություն:
Փաստաբանը համոզմունք հայտնեց, որ Վարդան Գրիգորյանը չի կարող անաչառ եւ անկողմնակալ լինել. «Դատարանը պաշտպանական կողմի հանդեպ անհարգալից վերաբերմունք է դրսեւորում: Մասնավորապես՝ պաշտպանի խոսելու ժամանակ մատ է տնկում, ասում՝ «հաթաթա մի տվեք», կամ՝ «օրենքը լավ չգիտեք»:
Դատավոր Վարդան Գրիգորյանը հեռացավ խորհրդակցական սենյակ՝ իր դեմ ինքնաբացարկի միջնորդության առնչությամբ որոշում կայացնելու։
Լուիզա ՍՈՒՔԻԱՍՅԱՆ
