Հոկտեմբերի 13-ին Տավուշի մարզխորհրդի նիստից հետո ամբիոն բարձրացավ «Զեոլիթ պրո» ընկերության ներկայացուցիչ Ահարոն Չիլինգարյանը: Նա Տավուշի մարզի համայնքների ղեկավարներին հայտնեց, որ իրենց ընկերությունը Կողբ գյուղի «Ղիասի քար» տեղամասում ցեոլիտի հանույթ է կատարում, որը մշակվում է Այրում քաղաքում:
Նա մանրամասն ներկայացրեց, թե օգտակար ինչ հատկություններ ունի ցեոլիտը, այն տարբեր նյութերով հարստացնում է հողը, ինչը նպաստում է առատ բերքին: Ցեոլիտը օգտագործվում է նաեւ ջրերի մաքրման համար, նաեւ՝ այլ ոլորտներում: Ա. Չիլինգարյանը հայտնեց, որ Ստեփանավանի ֆերմերներից մեկը Կողբի ցեոլիտն օգտագործել է հողի պարարտացման նպատակով եւ լավ բերք է ստացել: Նա ասաց, որ Կողբի ցեոլիտը մեծ քանակությամբ Իսպանիա արտահանելու պայմանավորվածություն կա:
Ա. Չիլինգարյանին հարցրինք, թե ինչքան ներդրում է կատարվել ցեոլիտի արտադրության մեջ, նախկինում Կողբի ցեոլիտի հանքն այլ ընկերություն էր իրականացնում, իրենք ի՞նչ առնչություն ունեն այդ ընկերության հետ: Նա հայտնեց, որ իրենց ընկերությունը գործում է 2014թ. հոկտեմբերից, արդեն 300 հազար դոլարի ներդրում է կատարել, նախկինում ցեոլիտի հանքը շահագործած ընկերությունը իրենք գնել են, մինչեւ 2020 թվականը Կողբի հանքավայրը շահագործելու իրավունք ունեն:
Տավուշի մարզպետ Հովիկ Աբովյանը հարցրեց, թե ի՞նչ արտադրողականությամբ է աշխատում ընկերությունը: Ա. Չիլինգարյանը հայտնեց, որ իրենք իրավունք ունեն տարեկան 32 հազար տոննա ցեոլիտ արդյունահանելու, սակայն այժմ 10 հազար տոննա են արդյունահանում:
Ա. Չիլինգարյանը նշեց, որ ցեոլիտի օգտագործման բնագավառները բազմաթիվ են եւ պատրաստակամություն հայտնեց ներդրողների առկայության դեպքում համատեղ ծրագրեր իրականացնելու: Նա ներողամտություն հայցեց, որ իրենց աշխատանքի հետեւանքով Այրում քաղաքը փոշոտվել է, հավաստիացնելով, որ շուտով այն կմաքրեն:
Ոսկան ՍԱՐԳՍՅԱՆ