Վարչապետ Կարեն Կարապետյանի՝ «Կումայրի» արգելոցը զբոսաշրջության կենտրոնի վերածելու ծրագրի մեկնարկից անմիջապես հետո Գյումրու քաղաքապետ Սամվել Բալասանյանն, այցելելով Մոսկվա, հորդորել էր հայ գործարարներին գալ ու ներդրում անել Գյումրու պատմական կենտրոնում։
Այսօր Aravot.am-ը Գյումրու քաղաքապետից հետաքրքրվեց, թե «Տաշիր գրուպի» սեփանակատեր Սամվել Կարապետյանից բացի, կա՞ն այլ գործարարներ, որոնք արձագանքել են իր առաջարկին։ «Շատ-շատ մարդիկ են եկել ու գալիս են։ Գալիս են, ասում են՝ հողեր տվեք։ Ես ուրախանում եմ, մարդիկ եկել, փողոցի վրա տներ են գնել, հիմնադրամին որ ասում ես մարդը եկել է, այս տունն է ուզում, ասում են՝ արդեն վաճառել ենք։ Շատ լավ է, խոսքս Ռուսթավելի փողոցի մասին է, Շիրազի փողոցի վրա ընդհանրապես բան չի մնացել, նույնիսկ մարդիկ իրար հետ վիճում են, թե ով պիտի գնի էդ բնակարանը կամ այդ շենքը։ Պատկերացրեք այդ վիճակն է։ Շուտով այս ամեն ինչը կերևա, որովհետև նախագծերը բերում են, համաձայնեցնում, որպեսզի արդեն սկսվեն շինարարական աշխատանքները»,- ասաց Սամվել Բալասանյանը։
Նունե ԱՐԵՎՇԱՏՅԱՆ
