Ֆրանկֆուրտի գրքի տոնավաճառին մասնակցող «Զանգակ» հրատարակչության թարգմանական եւ միջազգային ծրագրերի համակարգող Արթուր Մեսրոպյանն ահազանգել էր, որ ադրբեջանցիները հարձակվել են հայկական տաղավարի վրա ու փորձել այնտեղից խլել Արցախի դրոշով քարտեզները։ «Սկսվել է քաշքշուք, միջամտել է անվտանգությունը։ Մեր տաղավարում շատ քիչ մարդ է եղել այդ պահին, որովհետև շատերս, այդ թվում մենք, գնացել էինք հանդիպումների, սակայն ովքեր, որ եղել են թույլ չեն տվել քարտեզները վերցնել։ Հիշեցնեմ, որ սա ապաքաղաքական, զուտ գրքային տոնավաճառ է, բայց անգամ դա չի խանգարում մեր հարևաններին ցույց տալ, որ իրենք ոչ խաղաղ են, ոչ բարեկամ ու անգամ ոչ էլ հարևան ու ոչ էլ առանձնապես ցանկություն ունեն խաղաղ թվալու»,- գրել էր Մեսրոպյանը:
Aravot.am-ի հետ զրույցում նկարիչ եւ լուսանկարիչ Սեն Հովհաննիսյանն էլ հայտնեց, որ ադրբեջանցիները փորձել են գողանալ իր ստեղծած քարտեզը.«Անցյալ տարի էլ է նման միջադեպ տեղի ունեցել, իսկ այս տարի դա կրկնվել է: Ադրբեջանցիները չեն փոխվում»:
Սեն Հովհաննիսյանը նաեւ տեղեկացրեց, որ Մոսկվայի գրահրատարակչական ցուցահանդեսում իր «Նախիջեւան.ցեղասպանություն» ալբոմը, որտեղ ներկայացված են բացառիկ վավերագրեր, լուսանկարներ, պատմություններ եւ քարտեզներ, ցուցահանդեսի եզրափակիչ փուլ է անցել: «Ինձ հետ եզրափակիչ են դուրս եկել Ադրբեջանը եւ Բելառուսը: Նույնիսկ մի պահ ուզում էի հրաժարվել մրցանակից, չէի ցանկանում, որ հավասարության նշան դրվի իմ գրքի եւ Ադրբեջանում հրատարակված գրքի միջեւ»
Գոհար ՀԱԿՈԲՅԱՆ
Լուսանկարները REUTERS-ի
