Աջափնյակ եւ Դավթաշեն վարչական շրջանների ընդհանուր իրավասության դատարանում երիտասարդ բժիշկ Լեւոն Սահակյանին սպանելու գործով դատական նիստին այսօր հարցաքննվեց գործով վկա Գեւորգ Երիցյանը: Նա չմտաբերեց դեպքի մանրամասները, ինչի համար հրապարակվեց նրա նախաքննական ցուցմունքը, ինչը նա չհերքեց: Այս վկան Լեւոնին դանակահարելու բուն պահը չի տեսել, բայց եւ չի հերքել, որ ամբաստանյալ Վահան Ղազարյանը Լեւոն Սահակյանի հետեւից գնացել է ու վրան զենք է պահել:
Հիշեցնենք, որ Վահան Ղազարյանին մեղադրանք է առաջադրվել Թերլեմեզյան փողոցի 3-րդ հասցեում, Լևոն Սահակյանի նշանած Ա. Թովմասյանին աշխատավարձ չվճարելու հարցի շուրջ վերջինիս հետ վիճաբանության և քաշքշուկի մտնելու համար, որի ժամանակ իր մոտ առկա ծալովի դանակով մեկ անգամ հարվածել է վերջինիս ոտքին և մեկ անգամ կրծքավանդակի շրջանին, որի հետևանքով Լ. Սահակյանը մահացել է:
Գեւորգ Երիցյանը այս գործով վերջին վկան էր, որը դեպքի օրը նույն շենքում է եղել, հարեւան սենյակում մեկ այլ աշխատակցուհու հետ: Նա լսել է աղմուկը հարեւան սենյակում, որտեղ տուժողն ու ամբաստանյալն են եղել ու դուրս է եկել սենյակից՝ տեսնելու՝ ինչ է կատարվում: Հաջորդ նիստին հարցաքննվելու է ամբաստանյալը:
Արփինե ՍԻՄՈՆՅԱՆ
