«Հայի հաղթության ճանապարհով» ծրագրի շրջանակներում հունահռոմեական ոճի ըմբշամարտի աշխարհի չեմպիոն Մաքսիմ Մանուկյանն այսօր հանդիպեց Երեւանի պետական լեզվաբանական համալսարանի ուսանողների հետ:
Հարցերը բազմազան էին. ինչպես է սկսել ըմբիշի կարիերան, որոնք են նրա ուժեղ ու թույլ կողմերը, ում է նվիրել չեմպիոնական հաղթանակը եւ վերջապես ինչն է կարեւորում կնոջ մեջ: Բոլոր հարցերին աշխարհի չեմպիոնը պատասխանում էր հակիրճ:
«Դեռ մանկուց ոչ ոք ինձ չէր կարողանում հաղթեր «գյուլաշ» ասվածի ժամանակ: Սկզբից եղբայրս ընդունվեց ըմբշամարտի մարզադպրոց: Մի քանի օր հետո ես գնացի, հաղթեցի բոլորին ու հասկացա, որ ըմբշամարտը իմն է: Այդ ժամանակվանից միշտ ցանկացել եմ զբաղվել ըմբշամարտով ու դառնալ աշխարհի չեմպիոն»:
«Այլ մասնագիտությունների մասին չեմ մտածել: Կարծում եմ՝ եթե մեկ այլ մարզաձեւով զբաղվեի՝ արդյունքի կհասնեի»:
«Արագությունն իմ առավելությունն է եւ ամենաուժեղ կողմը»:
«Մարդու կարեւորագույն արժեքը մարդ մնալն է»:
«Բոլոր մրցակիցների դեմ գոտեմարտերից առաջ տրամադրվում եմ: Բայց, երկու հարեւան ունենք, որոնց հաղթելու ցանկությունն ավելի մեծ է: Ամեն դեպքում, եկեք չքաղաքականացնենք սպորտը»:
«Ոչ մի մարզիկ պարտությունը հեշտ չի ընդունում: Եղել են պահեր, երբ պարտությունից հետո մտածել եմ, որ այլեւս չեմ շարունակելու: Սթափվելուց հետո հասկացել եմ, որ չշարունակել պարզապես չեմ կարող: Առանց պարտության հաղթանակներ չեն լինում»:
«Աշխարհի առաջնությունում հաղթանակս նվիրել եմ հայրիկիս»:
«Ըմբշամարտն իմ ապրելակերպն է»:
«Կնոջ մեջ կարեւորում եմ պարզությունը, ճշմարտախոսությունը»:
«Աշխատում եմ կյանքում բացասականը չնկատել: Առանց այն էլ դրանք շատ են»:
«Աշխարհի չեմպիոն դառնալուց հետո ինչ-որ տխրություն կար: Չէի պատկերացնում, որ հեշտությամբ հաղթեցի: Հետո սթափվեցի, հասկացա՝ ինչ բարդ ճանապարհ եմ անցել՝ այդ կոչմանը հասնելու համար: Չեմպիոնության մասին երազել եմ 15-20 տարի: Իսկ առջեւում դեռ օլիմպիական խաղեր կան»:
Աշոտ ՀԱԿՈԲՅԱՆ
