Aravot.am-ը Շիրակի մարզի դատախազ Կարեն Գաբրիելյանից հետաքրքրվեց, թե քանի քրեական գործ կա հարուցված բուժաշխատողների նկատմամբ։ «ՀՀ Քրեական օրենսգրքի 130 հոդվածի հատկանիշներով հարուցված բազմաթիվ քրեական գործեր կան։ Այսինքն բուժաշխատողների կողմից իրենց աշխատանքային պարտականությունները չկատարելու կամ ոչ պատշաճ կատարելու արդյունքում անձանց առողջությանը վնաս կամ մահ պատճառելու վերաբերյալ։
Բուժաշխատողներին դատի տալու համար մեզ պետք է հանձնաժողովի դատաբժշկական փորձաքննություն։ Այսինքն` այդ փորձաքննության արդյունքներից ելնելով՝ մենք պետք է գնահատենք՝ իրականում այդ անձանց արարքներում կա՞ խախտում, թե՞ չէ , և այդ խախտումը գտնվո՞ւմ է պատճառական կապի մեջ մահվան կամ առողջությանը հասցրած վնասի հետ, թե՞ չէ։ Եթե ունեցել ենք, որ կա, մենք գործն ուղարկել ենք դատարան։ Մենք ունեցանք անձ, որին անցած տարի դատի տվեցինք և ունեցանք մեղադրական դատավճիռ։ Հիմա ունենք հարուցված բազմաթիվ քրեական գործեր, խոսքը մոտ 12 քրեական գործերի մասին է, որոնք գտնվում են նախաքննության փուլում, և մենք նշանակել ենք հանձնաժողովային դատաբժշկական փորձաքննություններ։ Եղել են դեպքեր, որ եզրակացությունը ստանալուց հետո, որով տրված է, թե խախտում չկա, մեզ մոտ կասկած է առաջացել կամ եզրակացությունը հիմնավորված չի եղել, պարզ ու ամբողջական չի եղել, մենք նշանակել ենք լրացուցիչ կամ կրկնակի հանձնաժողովային դատաբժշկական փորձաքննություններ»,-ասաց դատախազը։
Նունե ԱՐԵՎՇԱՏՅԱՆ
