«Ժիրայր Սեֆիլյանի եւ մյուսների» գործով դատական նիստում այսօր ամբաստանյալներից Ժիրայր Սեֆիլյանի շահերի պաշտպան, փաստաբան Տիգրան Հայրապետյանը ներկայացրեց նաեւ Սեֆիլյանի խափանման միջոց կալանքը վերացնելու մասին միջնորդություն: «Հիմքեր չկան նրան անազատության մեջ պահելու: Նա թույլ չի տվել այնպիսի արարք, որը հիմք կտա ենթադրելու, թե նա կխոչընդոտի գործի քննությանը կամ չի ներկայանա դատարան»,-վստահեցրեց Հայրապետյանը:
Գործով մեղադրող-դատախազ Պետրոս Պետրոսյանը միջնորդության դեմ առարկեց՝ նշելով, որ նա մեղադրվում է ծանր հանցագործություն կատարելու եւ ծանր հանցագործություն կատարելու փորձի մեջ, ուստի անազատության մեջ գտնվելով՝ կարող է խուսափել դատաքննությունից. «Նրա հանդեպ կալանքի որոշումն իրավաչափ է»:
Վերադառնալով խորհրդակցական սենյակից՝ դատավոր Տաթեւիկ Գրիգորյանը որոշեց նշյալ միջնորդությունը մերժել:
«Հիմնադիր խորհրդարան» ընդդիմադիր շարժման առաջնորդ, Շուշիի առանձնակի գումարտակի հրամանատար Ժիրայր Սեֆիլյանը մեղադրվում է ապօրինի զենք-զինամթերք պահելու, հանցավոր նպատակներով խումբ (ամբաստանյալներ՝ Ներսես Պողոսյան, Սասունիկ Կիրակոսյան, Գալուստ Գրիգորյան, Հովհաննես Պետրոսյան, Գեւորգ Սաֆարյան, Հրայր Թոփչյան) ձեւավորելու, շենք-շինություններ զավթելու փորձի մեջ:
Լուիզա ՍՈՒՔԻԱՍՅԱՆ
