Այս տարվա մայիսի 4-ին ճանապարհատրանսպորտային պատահարից խուսափելու փորձ կատարելիս վնասվել էր Ոսկան Ոսկանյանի «Ռոսգոսստրախ-Արմենիայի» կողմից ապահովագրված «Mersedses-Benz C230» 80 VV 077 համարանիշի ավտոմեքենան: Այդ պատահարից հետո փորձաքննություն էր անցկացրել «Եվրոպական դատական փորձաքննությունների ինստիտուտ» ՍՊ ընկերությունը:
Համաձայն փորձաքննության եզրակացության, «Մերսեդեսի» «հետվթարային դիրքում հայտնվելու դեպքում պետք է վնասվեր նաեւ այդ ավտոմոբիլի ձախ կողային մասը, մինչդեռ վնասված է աջ կողմի առջեւի դռան շրջանը»:
Այս տեղեկություններն անարժանահավատ են համարվել ապահովագրող ընկերության կողմից եւ մերժել են վարորդի դիմումը՝ ապահովագրական հատուցման վճարման պահանջի մասին:
Ոսկան Ոսկանյանը դիմել է ֆինանսական հաշտարարին:
Վարորդն «Առավոտին» երեկ ասաց, որ համաձայն չէ հատուցման վճարումը մերժելու մասին որոշման հետ, քանի որ որոշման պատճառաբանական հիմքը անհիմն է, եւ որ իր տեղեկություններն արժանահավատ են: Նա պահանջում է մեքենային պատճառված վնասի չափով 3 միլիոն 680 000 դրամ գումարը: Ի դեպ, վարորդին մասնագետներն ասել էին, թե հնարավոր չէ մեքենան վերանորոգել:
Ռ. Մ.
«Առավոտ»
12.10.2017
