«Շիլաշփոթ իրավիճակ է ստեղծվելու». «Սասնա ծռերի» պաշտպան (Տեսանյութ)

Ինչպես ավելի վաղ հայտնել էինք, Ոստիկանության ՊՊԾ գունդը գրաված եւ մի շարք ծանր հանցագործությունների մեջ մեղադրվող «Սասնա ծռեր» խմբի անդամների գործը կիսվեց ընդհանուր առմամբ երեք մասի՝ դատավոր Արտուշ Գաբրիելյանի որոշմամբ: Ամբաստանյալների պաշտպաններից փաստաբան Մուշեղ Շուշանյանի համար քրեական գործի քննությունը երեք մասի բաժանելու որոշումը հասկանալի չէ:

«Արդարադատության իրականացման տեսանկյունից սա լուրջ խոչընդոտներ է ստեղծում: Մեր պաշտպանյալներին առաջադրված մեղադրանքների հիմքում գրեթե նույն ապացույցներն են: Ստացվում է, որ երեք առանձին գործով նույն ապացույցներն են հետազոտվելու»,-Aravot.am-ի հետ զրույցում ասաց Մուշեղ Շուշանյանը:

Նրա խոսքով՝ հավանական է, որ երեք դատավարություններից յուրաքանչյուրում վկաները տարբեր ցուցմունքներ կտան: «Իսկ դա նշանակում է, որ շիլաշփոթ իրավիճակ կստեղծվի: Ինչպե՞ս է խնդիրը լուծվելու, պատասխանն այս պահին չկա»,-նկատեց փաստաբանը: Հավելենք, որ «Սասնա ծռերի» գործով դատավարության օր դեռեւս նշանակված չէ:

Մանրամասն՝ տեսանյութում:

Լուիզա ՍՈՒՔԻԱՍՅԱՆ