«Ծխախոտ առնելը պետք է լինի ամոթի պես մի բան»,-այս կարծիքին է առողջապահության կազմակերպիչ Արսեն Թորոսյանը: Նա գտնում է, որ ծխախոտը ոչ թե ֆիզիկական կախվածություն է առաջացնում, այլ` հոգեբանական, ուստի դրանից ազատվելը շատ ավելի հեշտ է. «Ծխող մարդիկ ինքնաթիռի մեջ 16 ժամ չեն ծխում այդ ինչպե՞ս են դիմանում»:
Այսօր «Արմենպրես»-ի մամուլի սրահում Արսեն Թորոսյանը եւ ՀՀ առողջապահության նախարարության գլխավոր մանկաբույժ Սերգեյ Սարգսյանը Ծխելու դեմ պայքարի ազգային օրվա առիթով ներկայացրին այն վտանգները, որոնք առաջանում են ծխելու հետեւանքով: Պարոն Թորոսյանը գտնում էր, որ առեւտրի կետերում չպետք է ծխախոտ վաճառվի, ոչ էլ դրա գովազդը լինի եւ որ ծխախոտը, ինչպես աշխարհի շատ երկրներում, պետք է առանձին դրա համար նախատեսված կրպակներում լինի` դարձյալ առանց գովազդվելու:
Մանրամասները տեսանյութում
Սերգեյ Սարգսյանն ասաց, որ տարվա մեջ մնացած 364 օրն էլ պետք է զբաղվենք ծխախոտի դեմ պայքարով: Ըստ նրա, ծխող ծնողների պարագայում ծխախոտի բացասական ազդեցությունը սկսում է դեռ երեխան չծնված եւ պտուղն արդեն կրում է ծխի ազդեցությունը եւ արդեն ծնվելուց հետո սկսում է հաճախ հիվանդանալ, երեխաների մոտ, ինչ-որ տարիքից սկսած, ասթմատիկ երեւույթներ են ի հայտ գալիս եւ այլն:
Պարոն Սարգսյանի խոսքով, ծխախոտի օգտագործմամբ բարձր ցուցանիշներ ունեցող երկրներում տնտեսական բացասական հետեւանքներն էլ մեծ են լինում: Օրինակ` Հայաստանը, որտեղ ծխող են տղամարդկանց 52 տոկոսը, կանանց 2 տոկոսը, ծխելու պատճառով միլիոնավոր դոլարների կորուստներ ենք ունենում:
Մանրամասները` տեսանյութում
Այդուհանդերձ պարոն Սարգսյանը վստահեցնում է, որ ճիշտ է ծխելու ցուցանիշներով Հայաստանն այնքան էլ բարենպաստ դիրքերում չէ, հատկապես տղամարդկանց առումով, բայց օրինակ` Լիտվայում դեռահասների 70 տոկոսն է ծխում աղջիկների` 55 տոկոսը:
Լուսինե ԲՈՒԴԱՂՅԱՆ
