Եվրոպայի խորհրդի խորհրդարանական վեհաժողովի (ԵԽԽՎ) աշնանային նստաշրջանի լիագումար նիստի ընթացքում ձայների 67 «կողմ» և 0 «դեմ» հարաբերակցությամբ ընդունվեց Նիդերլանդները ներկայացնող պատվիրակ Փիթեր Օմզիգի (լուսանկարում) «ԴԱԻՇ-ի կողմից մարդկության դեմ հանցագործությունների, անգամ հնարավոր ցեղասպանության հետապնդումը և պատժումը» վերնագրով զեկույցի բանաձևը:
ԵԽԽՎ պատվիրակներն այս բանաձևի կապակցությամբ ազատ քննարկումների ընթացքում իրենց ելույթներում կարևորեցին ցեղասպանությունների և ահաբեկչությունների դեմ պայքարի ավելի գործուն մեխանիզմների մշակման անհրաժեշտությունը: Շեշտադրումը հատկապես կատարվում էր կրոնական հողի վրա ցեղասպանությունների վրա, հատկապես Սիրիայում ԴԱԻՇ ահաբեկչական խմբավորման կողմից հազարավոր անձանց կյանքը խլելու փաստին:
Ադրբեջանի պատվիրակության անդամները, սակայն, քննարկումը տեղափոխեցին այլ հարթություն:
Ադրբեջանցի պատվիրակ Գանիրա Փաշաևան ներկայացրեց, թե եվրոպական շատ կազմակերպություններ, այդ թվում նաև ԵԽԽՎ-ն հրաժարվել են Իրաքից, Սիրիայից փախստականներին աջակցություն տրամադրել, մինչդեռ Ադրբեջանը, որի բնակչության մեծամասնությունը մուսուլման է, աջակցություն է ցուցաբերել նրանց: Ադրբեջանցի պատվիրակը հատուկ շեշտեց, թե Թուրքիան էլ է մեծ աջակցություն ցուցաբերել փախստականներին:
Այնուհետև տիկին Փաշաևան հայտարարեց, թե Ադրբեջանը ևս տուժել է ահաբեկչությունից, որն իբր կազմակերպվել էր հայկական ահաբեկչական խմբավորումների կողմից:
Լիտվան ներկայացնող պատվիրակ Էգիդիյուս Վարեյկիսը մտահոգություն հայտնեց, որ աշխարհում մեկ միլիոն մարդ սպանվել է կրոնական հայացքների համար: Նա հայտարարեց. «Պետք է մեխանիզմներ մտածել, որ ԵԽԽՎ-ն կրոնական հակամարտություններում դառնա խաղաղարար»:
ԵԽԽՎ-ում հայկական պատվիրակության անդամ Ռուստամ Մախմուդյանը հայտարարեց, թե ինքը հանդես է գալիս ոչ միայն ՀՀ ԱԺ-ն ներկայացնող պատգամավոր, այլև եզդիական համայնքի ներկայացուցիչ: Այնուհետև հայտարարեց, թե 2014-ի օգոստոսին ավելի քան 5000 եզդիներ են սպանվել ԴԱԻՇ-ի կողմից: Նա կարևորեց նման ոճրագործությունների կանխարգելման համար մեխանիզմների մշակման անհրաժեշտությունը:
ԵԽԽՎ Ադրբեջանի պատվիրակության մեկ այլ անդամ՝ Զուհալ Ֆատալիևան, վեհաժողովին Խոջալուի դեպքերը ներկայացրեց որպես Հայաստանի կողմից կատարված ցեղասպանություն, որի ընթացքում շուրջ 600 ադրբեջանցիներ սպանվեցին իրենց ազգային պատկանելության համար: Նա վստահեցրեց, որ եթե նման ոճրագործությունները կանխարգելվեին, չէր լինի ԴԱԻՇ-ը:
Տաթև ՀԱՐՈՒԹՅՈՒՆՅԱՆ
