Այսօր կառավարությունը համաձայնություն տվեց «ՀՀ կառավարության եւ Ռուսաստանի Դաշնության կառավարության միջեւ ՀՀ կառավարությանը պետական արտահանման վարկ տրամադրելու մասին» համաձայնագրի կնքման առաջարկությանը:
Ըստ այդմ, Ռուսաստանը Հայաստանին կտրամադրի 100 միլիոն դոլարի պետական արտահանման նոր վարկ՝ ժամանակակից սպառազինության եւ տեխնիկայի ձեռքբերման, մատակարարումների ֆինանսավորման համար:
Նշված համաձայնագրով նախատեսվում է 100 միլիոն դոլարի չափով ներգրավվող պետական արտահանման վարկը տրամադրել 20 տարի ժամկետով, որից 5 տարին՝ արտոնյալ, տարեկան 3% տոկոսադրույքով: Համաձայնագրի համաձայն, Հայաստանի կողմից նախատեսվում է համաֆինանսավորում համաձայնագրի շրջանակներում կնքվող պայմանագրերի արժեքի 10%-ի չափով՝ ավանսային վճարումների տեսքով:
Հայկական կողմը վարկն օգտագործելու է 2018-2022 թվականների ընթացքում:
Ըստ համաձայնագրի, կանխավճարային վճարումները կազմում են յուրաքանչյուր պայմանագրի արժեքի ոչ պակաս քան 10 %-ը եւ իրականացվում են հայկական կողմից հօգուտ ռուսաստանյան լիազորված կազմակերպությունների՝ ԱՄՆ դոլարով:
ՀՀ պաշտպանության նախարարության եւ «Ռոսոբորոնէկսպորտ» ԲԲԸ միջեւ կստորագրվեն առանձին պայմանագրեր ժամանակակից սպառազինության եւ տեխնիկայի` ՀՀ-ին տրամադրելու կարգի, ժամկետների, այդ ռազմական տեխնիկայի կիրառմանը վերաբերող տեղեկատվության տրամադրման պայմանների, կողմերի պարտավորությունների, դրա նորոգման եւ տեխնիկական սպասարկման պարտավորությունների, ձեռքբերման համար վճարումների եւ այլ հարցերի վերաբերյալ:
Հայկական կողմը վարկն օգտագործում է հաշվարկված արտադրանքի մատակարարման վերաբերյալ պայմանագրերից յուրաքանչյուրի արժեքի մինչեւ 90%-ի ֆինանսավորման համար` կնքված սույն համաձայնագրի 8-րդ հոդվածին համապատասխան պայմանագրերում նշված ռուսական եւ հայկական կազմակերպությունների միջեւ:
Վարկով տրամադրվող ռազմական նշանակության արտադրանքը մատակարարվելու է ըստ համաձայնագրով սահմանված ցանկի, եւ ինչպես նշված է համաձայնագրում, ցանկը կարող է փոփոխվել ՀՀ պաշտպանության նախարարության եւ ռազմատեխնիկական համագործակցության դաշնային ծառայության միջեւ փոխադարձ գրավոր համաձայնությամբ:
Հիշեցնենք, որ 2015 թվականին ՀՀ-ի եւ ՌԴ-ի միջեւ ստորագրվել էր սպառազինություն ձեռք բերելու համար 200 միլիոն դոլարի վարկային համաձայնագիր, ըստ որի սպառազինության մի մասն արդեն տրամադրվել է:
Նելլի ԲԱԲԱՅԱՆ
