«Նախորդ՝ 2012թ. զորավարժություններից հինգ տարի է անցել, փոխվել են մոտեցումները եւ հակամարտությունների գարգացման մեզ հայտնի մեթոդները, հետեւաբար, դա բերել է որոշումների փոփոխության: Ամենաբարդ հարցը կառավարման կազմակերպումն է, ինչի ուղղությամբ խորացված հետազոտություններ ենք իրականացնում»,-«Սպուտնիկ Արմենիա» մամուլի ակումբում այսօր լրագրողների հետ հանդիպմանն ամփոփելով ՀՀ զորավարժարաններում անցկացվող ՀԱՊԿ-ի «Փոխգործակցություն 2017» զորավարժությունների ընթացքը, ասաց ՀԱՊԿ շտաբի պետ Անատոլի Սիդորովը:
«Չենք թաքցնում, որ հակառակորդը պայմանական է՝ այն մի պայմանական պետություն է, որը սրել է իրավիճակը եւ դիմել ռազմական գործողությունների: Մենք էլ չեզոքացրինք դրանք»,-նկատեց նա:
Անատոլի Սիդորովը փաստեց, որ զորավարժությունների ժամանակ թերություններ էլ են եղել. «Եթե ամեն ինչ հարթ լիներ, նման կերպ չէինք աշխատի: Կան թերություններ, բայց հրամանատարական կազմի նախապատրաստումը բավականին բարձր էր: Թերությունները կներկայացնենք ՀԱՊԿ ղեկավարությանը՝ հետագայում դրանց վերացման ուղղությամբ աշխատելու նպատակով»:
Հավելենք, որ զորավարժությունները կավարտվեն վաղը՝ ՀՀ զորավարժարաններից մեկում: Սիդորովի փոխանցմամբ՝ կմասնակցեն նաեւ ոստիկանության եւ Արտակարգ իրավիճակների նախարարության համապատասխան ստորաբաժանումներ:
Սիդորովը կարծիք հայտնեց նաեւ ՀԱՊԿ որոշ երկրների եւ Ադրբեջանի միջեւ համագործակցության, այդ թվում՝ զենքի վաճառքի մասին: Նա քաղաքական գնահատականներ չհնչեցրեց, բայց նշեց. «Եթե որոշ երկրներ գործակցում են, երեւի դրա համար կան այդ երկրների ղեկավարների որոշումներ, որոնք խորն են գնահատում իրավիճակը: Կարծում եմ խնդիրն է՝ հավասարակշռությունը պահելը»:
Լուիզա ՍՈՒՔԻԱՍՅԱՆ
