Հազի, բրոնխիտների, բերանի խոռոչի բորբոքային, ինֆեկցիոն ծագման հիվանդությունների ժամանակ արդյունավետ միջոցներից են ուրցով պատրաստուկները:
10 գրամ ուրցի խոտին ավելացնել 200 միլիլիտր եռման ջուր, կափարիչը ծածկած թրմել 15 րոպե, սառեցնել սենյակային ջերմաստիճանում 45 րոպե, քամել: Ջրաթուրմի ծավալը հասցնել 200 միլիլիտրի եռացրած ջրով: Ընդունել 1 ճաշի գդալ՝ օրը 2-3 անգամ, ուտելու ժամանակ:
Կարող եք պատրաստել մեկ այլ պատրաստուկ. 20 գրամ բույսի վրա լցնել 200 միլիլիտր եռման ջուր, կափարիչը ծածկել, թրմել ջրաբաղնիքի վրա 30 րոպե, սառեցնել սենյակային ջերմաստիճանում 10 րոպե, քամել: Եփուկի ծավալը տաք ջրով հասցնել 200 միլիլիտրի: Ընդունել 1-2 ճաշի գդալ՝ օրը 3-4 անգամ:
Նույն եփուկով կատարել բերանի խոռոչի եւ ըմպանի ողողումներ:
Հակացուցումներ
Դեղաչափի գերազանցման դեպքում կարող է առաջանալ գլխապտույտ, սրտխառնոց եւ փսխում: Այդ պատճառով տնային պայմաններում պատրաստելիս հարկավոր է խստիվ հետեւել դեղաչափին եւ պատրաստման տեխնոլոգիային:
Նշենք, որ ուրցն ու նրանից ստացվող պատրաստուկներն օժտված են հակաբորբոքային, հակամանրէային, խորխաբեր, սպազմոլիտիկ հատկություններով: Ջրաթուրմն ու եփուկը ոչ միայն կիրառում են բերանի խոռոչի եւ ըմպանի բորբոքային հիվանդությունների ժամանակ (ինֆեկցիոն բնույթի¤, այլեւ նշանակում են լարինգիտի, տրախեիտի, բրոնխիտների ժամանակ:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ»
11.10.2017
