ՀՀ սպորտի եւ երիտասարդության հարցերի նախարարության նախաձեռնությամբ, ՅՈՒՆԵՍԿՕ-ի դրամաշնորհի շրջանակներում Երեւանում «Մրցել ազնիվ» խորագրով ընթացող հակադոպինգային հարցերի վերաբերյալ ուսուցողական սեմինարից առաջ Հայաստան ժամանած ըմբշամարտի միջազգային ֆեդերացիայի (UWW) հակադոպինգային հարցերի պատասխանատու Կառլոս Ռոուն հանդիպեց լրատվամիջոցների հետ:
Aravot.am-ի հարցին, թե 2008/2012 թթ. օլիմպիական խաղերին կրկնական դոպինգ ստուգման հետեւանքով տարբեր մարզաձեւերում զանգվածային որակազրկումների կիրառումը թողնվել է միջազգային ֆեդերացիաներին, ինչը մի տեսակ խառնաշփոթ վիճակ է առաջացրել: Որպես մարզական միջազգային ֆեդերացիայի ներկայացուցիչ ինքը չի՞ համարում, որ ավելի ճիշտ կլիներ՝ ՄՕԿ-ը պատժի միասնական համակարգ սահմաներ, Կառլոս Ռոուն պատասխանեց. «Բանն այն է, որ մարզիկը, եթե կարելի է ասել, պատկանում է տվյալ մարզաձեւի միջազգային ֆեդերացիային, գտնվում է նրա իրավասության ներքո, այլ ոչ թե Միջազգային օլիմպիական կոմիտեի: Այդ պատճառով է կարգազանց մարզիկների նկատմամբ պատժամիջոց կիրառելու իրավունքը թողնվել միջազգային ֆեդերացիաներին»:
Աշոտ ՀԱԿՈԲՅԱՆ
